青春雖霎時，生命恆久遠
人嘅思想達到一定高度，即使所擅之事各有唔同，性格亦相去甚遠，都可以能量互通，深為感動。雖然每個人都係個體，唔會有任何人可以狂妄到話完全理解另一個人，但睇完林夕今日以「你霎時的青春，並非徒然的夢」為題嘅專欄文章，我當下眼泛淚光，情緒洶湧。我極少欣賞同尊敬他人，但我成日都同身邊人講，林夕係香港文化一大推手，將來建國之後，一定會為佢立館設展，等佢嘅詞作得以傳世，而一個人之所以寫得出所謂傳世之作，其實從來唔在於技巧之高，心思之細，而係在於其人每日精進，修身不倦。
林夕寫，佢為周同學緊握十字架，向上帝祈禱，內容係：「我知道沒資格跟祢講條件，但是，如果，祢能恩賜一個奇蹟，往後每晚向祢祈禱，我願意。」無恥如同當年〈少女的祈禱〉中嘅歌者。無人不知，林夕經常借流行曲向世人輸出佛學，但事實上，根據佢早年散文集所述，佢後生時代曾經係基督徒，相信有神。一般人一定會認為，提倡佛學嘅人忽然祈禱係自相矛盾，但我相當明白佢嘅無助失措，更理解佢智慧之高——事關佢知道唔同宗教嘅用途，一早已經超越迷信。
佛學好處，在於鼓勵自身精進，個體以修道成佛為目標，絕非壞事，一乘佛教，我極推崇。而就算將門檻降得再低，低到不明佛學但迷信佛教，堅持初一十五食齋，善信有情，都總比唯物主義者心地善良。呢種善良雖然難免流於偽善，但身處於無風無浪嘅和平時代，佢地至少唔會形成威脅，更唔會濫殺無辜，羞辱以至虐殺手無寸鐵嘅人。以離苦即樂為宗旨，並非罪過，但人類渴望情愛關懷理應無罪，佛教主張消除慾望，以平常心處世，其實只係迴避人類社會真正難題，遁入空門絕非上上之策。林夕知道佛學之功德，以經為鏡，以哲學視之，未有陷於廣大中土佛教徒之不問世事，避禍自保，如此境界，並非佛教徒所能達到。
而基督教比佛教優勝之處，正在於教義既會鼓勵自身精進，亦強調互愛嘅重要。神愛世人，甚至派出耶穌降臨人間，為世人死於十字架上，神嘅人格化，促使就算喺自己人生之中從未見過人性光輝嘅人，都深刻體會到愛嘅毫不保留，無所畏懼。我讀聖公會小學嘅時候，熱衷挑戰聖經故事，覺得全部故事都係近乎反智，甚至曾經因為亂做宗教科功課而記過缺點，但其實點解否定耶穌就要記缺點，我從來都唔明白。直至我大個咗，因為感受過愛，我至終於明白基督教對我而言再無聊都好，當年嘅缺點係我罪有應得，因為我否定緊嘅係人性。當然，區區一個小學教師，未必對宗教哲學深入研究過，但幾經周折，我已經領受報應，意識到手冊上嘅功過紀錄，確實係我年少輕狂嘅印證。
心如亂麻，藥石亂投，忽然向上帝禱告，上帝自然唔會有回音。我唔相信上帝保佑，但我理解人類處於恐懼之中，渴望回音。所以，外冷內熱嘅林夕之所以失去方寸，發出壯語，實際上並唔係求助於任何神明，而係喺佢心中嘅宗教尚未成為實體之前，只能以祈禱去排解自身無力解決問題之苦痛，希望有心人會聽得到。本來，佢認為「周同學只是個熟悉的陌生人」，因此佢懷疑自己嘅情緒從何而來，而睇完《1987：逆權公民》之後，佢意識到「悼念周同學，其實也在悼念我們被剝奪的自由、悼念真正暴徒暴政丟掉的良知、悼念人類史上為爭取公義而犧牲的人，悼念已成回憶的香港。難怪，沈甸甸如生命中不能承受的重。」情緒梳理過後，林夕清楚知道，原來潸然淚下，只因心中有愛，而對陌生人都竟然有愛，既係問題，同時更係答案。
周同學之死，「比過去遠之又遠的親人逝去還要沈重」，要究其原因，可以從林夕寫畀張敬軒嘅〈披星戴月〉中提到嘅情況之中搵到共鳴。「世界大得不可以去擁抱／你腳印又小得轉眼散失於命數」，普世價值無法空談，只因大愛始於小愛。「關注遠方得到讚賞／但是我哭以巴開火很牽強」，他國戰事，死傷再枕藉都未有切膚之痛，但從來唔會有一單新聞，比同胞遇害，更加怵目驚心。「問心只妄想跟你快樂牧羊／憑這成就到老去亦安詳」，簡單過日子絕對講唔上人生成就，但可惜嘅係，暴政面前，行人止步，周同學已經失去人生一切可能。「只因想到我們開仗／也因不懂去包容才留遺恨在雪上」，大概就係西灣河槍擊案發生之後，大家即使知道罷工實效不彰，都仍然嘗試罷工一日嘅原因。
「每一天都有所為／才能無負過晚上」，講好容易，但做到嘅人從來少之又少。尋晚同一個朋友傾偈食飯之後，我心情稍為好轉，但入夜後又再失眠，於是我好認真咁做咗個思想實驗：如果有一日，我真係成為有能力承擔同胞生命重量嘅人，一隻船上面有我最好嘅朋友，另一隻船上面係幾千個我根本唔識嘅所謂香港人，我會唔會做唔出最好嘅決定，然後我就泣不成聲。女朋友喺我身邊，以如同林夕之表面冷靜口吻提醒我，呢種永遠過唔到自己嘅感覺，正係日後足以令你嘅決定最令人信服嘅原因，因為你珍惜生命，顯示出足夠嘅愛，大家自然會知道你嘅決定係有原因，而就算我最後決定要炸毀載住佢自己嗰隻船，佢都會坦然接受，因為佢知道，自己嘅死亡一定係為咗救到更加多嘅人，而且我永遠唔會忘記佢。最後我喊到失控，只可以講出一句，「做中國人，真係比做香港人容易太多」。
然而當我今朝終於勉強瞓咗陣再醒，我睇到林夕，見到佢都極為痛苦，但佢都仍然以「如果那一天並未到來，悲憤之後，我們要做個更強壯的香港人」作結，我睡前嘅一時動搖一掃而空，因為從來只有首先有所堅持嘅人，至會達到受到動搖嘅門檻，而動搖過後嘅信念，亦只會一次比一次堅定。畢竟，林夕唔係真正需要上帝，我亦唔係真正需要上帝，因為精進之人想要尋求依靠嘅剎那軟弱，代表住嘅係對自己所堅信之事嘅反覆拷問。透過釋放軟弱，我地至可以激發出更大力量，然後變得更強去保護自己同他人，等大家都可以整理過去嘅傷痛，面對當下嘅傷痛，免於未來嘅傷痛。而呢種求生意志，要同身邊人同生共死嘅信念，至係世界上一切信仰嘅發源。
「人總需要勇敢生存／我還是重新許願／例如學會／承受失戀」。周同學之死，已成定局，真正重要嘅係，我地如何加以消化，從而減少日後更多嘅失去。「要擁有必先懂失去怎接受」，從來唔限於兒女私情，因為只要面對失敗，反思失敗，至會更快振作，更快成為更好嘅人。「擁不擁有也會記住誰／快不快樂留在身體裡」，人嘅生命，如果可以喺其他人嘅生命之中留低痕跡，犧牲自然萬世都不朽。林夕寫過無數苦情歌，但同時佢亦不斷提點大家出路就喺不遠處。佢成長路上嘅思考過程，全部赤裸公諸於世，只要稍微認真去聽，應該足以令大家更了解何謂愛。
我同林夕，真正嘅信仰，其實從未歸於任何宗教，因為我地嘅靈魂，早已經有所歸屬，只係喺關鍵時刻來臨之前，大家都後知後覺。林夕已經填過太多技驚四座嘅詞，才華有目共睹，但所有作品，都無法完全反映出佢嘅全部，因為佢嘅人生使命，其實至今尚未完成。喺〈願榮光歸香港〉面世之後，大家對歌詞質素議論紛紛，有人話原作難登大雅之堂，又有人話新作過於艱澀難明，友人問起，我畀出嘅答案只有四個字：交畀林夕，因為搵勻全香港，絕對唔會有人比佢更適合。每次聽呢首歌，我都會想像，如果係國歌，佢會寫出一份何其有血有肉嘅心血結晶——如無意外，應該比寫過畀王菲、楊千嬅、陳奕迅，以至黃耀明嘅，都要更為感動人心。
精進自身，分工合作，林夕已經先大家一步，率先做到。我相信，林夕出現於香港詞壇，只係為咗經受千錘百鍊，以成就佢人生中最重要嘅一份詞，而只有等到可以完成呢份無比重要嘅歌詞，佢至可以不至於含恨而終，鬱鬱而去。而我身為對填詞一竅不通嘅人，可以做嘅，就係喺我嘅崗位全力以赴，好使人生中最重要嘅機會出現之時，我都可以緊緊掌握，無負同樣努力不懈嘅同胞。因為香港，我皈依為宿命論者，我相信香港夢絕對會成真，而路上所流嘅每一滴血，每一滴淚，都絕非虛無，絕非徒然，而係煉成緊更無堅不摧嘅信仰。
離時代遠遠，沒人間煙火，毫無代價唱最幸福的歌，願大家都可。
https://gnimmm.com/2019/11/12/dedicated_to_chow/
圖片來源：遠流出版社
神愛我和你歌詞 在 神愛我愛你... - 讚美，敬拜，基督教詩歌 - Facebook 的推薦與評價
神愛我 愛你曲/詞: Unknown 神愛我愛你，造天空大地，造左許多樹木俾我地， 又有香蕉樹、又有芒果樹、仲有西瓜蕃茄滿田園， 雀仔吱吱叫、兔仔蹦蹦跳、隻狗日日尾搖搖， ... ... <看更多>