《回到家鄉的第9日》
好感激呢段日子收到好多身邊親戚朋友嘅慰問，亦收到喺呢度嘅朋友仔們祝福。實在感恩我同意佬重重被愛包圍♥️
上星期係老爸生日，按道理我應該可以返香港陪佢渡過佢嘅大日子。佢生日之前，我同佢講，去定留，我唔知點抉擇，佢就答我：
「無論你逗留埃及、意大利或者香港，你冇感染就係贏。事業同錢財都係身外物；有命就有錢，冇命有錢都冇用。」
喺我以為老爸需要我嘅時候，原來係我更需要佢。一針見血嘅教誨，一語道破嘅人生哲理，從小如此，今日亦然。
誰不知同老豆老媽視障完之後意佬就發燒🙈你睇佢嗱埋口面咁，因為佢當時已經全身肌肉都痛緊。而佢發燒同時，其實我哋兩個都肚瀉咗兩三日，早午晚三餐，倒親啲乜落肚都好快出返嚟😳喂～武肺病徵好似唔包括肚疴噃......我哋一致認為，我哋喺埃及嘅diet實在缺乏營養得可憐，依家返到嚟意大利食好西，肚仔都唔適應😅
踏入自我隔離嘅第二星期，意佬表示既興奮(退燒後冇反覆再燒)又緊張(因為要自己出去買餸好危險)。我絕對理解，截至今日意大利累計確診已達74386宗，最恐怖係死亡人數達7503人。
這麽遠那麼近，老爸遠在香港，但佢叮囑我嘅說話日日就好似喺我耳邊提醒我，一定要撐住唔可以冧檔！我要好好照顧意佬同教育奶奶一家點樣做好防疫措施。父女間，好多時都係盡在不言中，由細到大一直放手俾我去闖，到依家危難關頭又令我勇氣得到加持。老豆，多謝你，希望一切快啲過去，可以返嚟同你哋拆餐勁嘅！
Role Play : #Simpson大嬸
#意大利隔離實錄
#病徵攬炒自己嚇自己
#嫁到意大利
#盡在不言中
#錯過了生日
#但無錯過做你兒女
