霸道總裁愛上你（上）
我叫小霜，係一個好普通嘅女仔。
同好多女仔一樣，我細個都有幻想，會遇到自己嘅白馬王子，走上人生巔峰。
但我漸漸長大，就開始發現，人生巔峰係留畀靚女嘅。
而我，唔係靚女。
輸在DNA嘅我，只可以一步一腳印，努力讀書，努力返工，為每年加幾%嘅人工而欣喜。
一路計算住，自己要儲幾耐錢，先可以儲到首期；
一路睇住娛樂新聞，某某靚女收到幾千呎豪宅做禮物。
正所謂「沒有醜女人，只有懶女人」，我都試過努力扮靚㗎，但最多比原來靚少少，離「靚女」都仲有十萬九千里遠。
這些機會不是屬於我的，我都係腳踏實地，諗吓點樣賺多一千幾百。
無幾耐，公司嘅總裁助理辭咗職，佢個職位好高人工，工時又唔算長，我哋都唔明佢點解要走。
我被升職為總裁助理，人工高咗一截，當然好開心。
但係做咗一輪，我發現總裁脾氣好差，郁啲就鬧人掟嘢，有幾次仲想郁手打我，搞到我好大壓力。
我終於明白，點解之前嘅助理會辭咗職。
唉，我都想辭職，但又唔捨得份人工。
糾結咗一輪，直到有一次，總裁又發脾氣，狠狠打咗我一巴。
我眼冒金星，公司出錢，畀我住私家醫院，仲話要賠錢，求我唔好報警。
我唔算傷得好重，都無打算搞大件事，不過返工啫，無理由搵命搏，出院後我肯定會辭職。
有咗呢筆賠償金，我都可以支撐一段時間，睇吓可唔可以搵到更好嘅工作。
後來我表妹嚟探病，漏咗本書喺病房。
我順手拎起嚟睇，本書叫《霸道總裁愛上你》，由於對愛情已經無咩幻想，我平時都無睇愛情小說，不過住院太悶，我就拎本書嚟揭吓。
一睇，我倒抽一口涼氣！
因為，女主角嘅遭遇同我一模一樣。
一個長相平凡嘅女仔，努力工作，終於升為總裁助理。
英俊多金嘅總裁，偏偏脾氣暴躁，成日打人鬧人。
女主角本來想辭職，但佢有一顆善良嘅心，佢覺得總裁內心空虛寂寞凍，非常可憐。
於是佢堅持落去，任總裁打罵，終於打動咗總裁，解開心結，令總裁變成溫柔嘅筍盤。
總裁亦愛上咗佢嘅善良，男女主角終成眷屬，從此幸福快樂咁生活落去。
呢本書巧合地出現，正正係暗示，我就係《霸道總裁愛上你》嘅女主角！
仔細諗一諗，我公司嘅總裁輪廓都幾出色，只係佢平時成日鬧我，你唔會研究一隻老虎靚唔靚仔㗎嘛。
如果總裁變得溫柔而專一，絕對係完美金龜婿。
睇嚟我嘅使命，就係拯救有心結嘅總裁，踏上人生巔峰。
所以我無辭職，出院後就繼續返工，總裁望住我：「我以為你會走。」
作為善良嘅女主角，應該點答？
我早就睇晒《霸道總裁愛上你》，我用最誠懇嘅語氣答：「對對錯錯，恩恩怨怨，都係水過無痕。只有一顆展望未來嘅心，先係永恆嘅美麗。」
總裁行埋嚟，突然間，伸出左手攬住我條腰。
我個心跳得好快，佢係咪要錫我？我應該用咩態度嚟回應？嬌羞、激動、平靜......
下一秒，總裁用右手一拳窩落我個肚度，痛到我眼淚都出埋。
總裁好溫柔咁同我講：「原來你鍾意俾人打，真係好特別。」
據講，如果一個男人讚女人「好特別」，就係有好感嘅象徵。
雖然呢個開始有啲痛，但......都係一個好嘅開始？
自此之後，我成為咗總裁嘅人肉沙包。
有一次，佢要出席宴會，就畀錢我買咗套晚禮服，叫我做佢嘅女伴。
我睇得出，總裁都愈嚟愈鍾意我，例如佢打完我之後，會問吓我痛唔痛，畀錢我睇醫生。
但係，我已經唔想再慢慢培養感情，因為日日俾人打，真係好痛。
我要盡快搵出總裁嘅心結，將佢變成筍盤。
喺一個OT嘅晚上，我指住窗外嘅天空：「星星離我哋咁遠，這麼近，那麼遠，你覺得，世界上最遙遠嘅距離係乜嘢？」
總裁皺一皺眉，無答我。
「人生一步一驚心，愛情一步一痛心，你有無試過，為一個人而痛心？」我想試探吓，佢嘅心結係唔係情傷。
下集：http://bit.do/e4FYu
將專頁設定為「搶先看」/ "See first"，最新故仔馬上睇！
吻醒睡公主之後，佢變咗一個港女：https://goo.gl/phZdbV
課金投胎：https://goo.gl/szezW8
#短故 #短篇 #小說 #陳美濤 #廣東話 #粵語 #tomatochan #霸道總裁愛上你
美金龜 在 美金龜- Explore 的推薦與評價
高雄同協轎班會. · April 16, 2021 ·. 高市小港官將會許家前往澎湖山水上帝廟迎接美金龜回高雄繞境. #美金龜. 1.1K. 1 Comment. 6 Shares. ... <看更多>