#職業是兒子 #聽講近來清盤大師好多job
港姐、警察此類曾經擁有光環的職業，今時今日要招募，都係用同一個包裝——就係「絕世筍工」，證明呢一份工嘅價值，已窮得只剩下錢。不過如果你問我，世上只有一份工，配得上「絕世筍工」嘅稱呼——那份職業叫「兒子」。
大約早兩個月，上咗去財仔朋友公司吹水（唔係借錢，我冇財困），中間佢同事打咗個電話：「喂？兄弟，我有個客想撲水，你嗰邊有冇fund source？邊個？大戶嚟架，好出名。」然後呢位仁兄嘗試扮細聲，用晒氣咁講，但實際上係以全世界都聽到嘅高分貝聲量去講，「咪波叔個仔囉，係呀，佢間BVI要度水呀。」
重點係，朋友呢間財仔只係三、四線嘅細行，可想而知，當時情況有幾嚴峻。結果，《蘋果》上個月底成功訪問波叔，證實咗上述消息，仲講到明「銀行都借到爆，咁就貴啲（財仔）都要借！」。
波叔個仔近年雄心壯志，又要做「酒店大亨」，夾夾埋埋成14幢；年頭入主松齡護老集團（1989），要知道，佢用超過1倍溢價去買，呢度又使多7.73億；之後，仲積極活化舊工廈，大搞Co-working space……總之咩都有啲咁啦。
中環行走江湖，總會有啲人所共知嘅秘密，例如好多人都會話，「佢搞咁多嘢，好明顯係想試吓做到上市公司主席。」然後朋友話，「阿仔仲已搵香港首屈一指嘅『清盤大師』去幫手睇睇盤數。」搵大師級專家去幫手睇數，又唔一定係去到大家諗到嘅worst case嘅；「華記mode」正能量去睇呢件事，至少佢肯搵人認真執靚盤數，點都好過佢自己亂嚟。
即係咁，富二代有野心唔係問題，真係no offense嘅，你搞得好嘅，就係成為一個有為嘅富二，拓展家族王國，光宗耀祖、揚名立萬；博輸咗、太大想頭兼唔好彩嘅，就只係變成敗家仔咋嘛。
「嘩！乜你咁講嘢！敗家仔『咋嘛』？」一個富二代，仲要係超級富二代，輸咗，咪最多輸個名，爛船都有三斤釘，佢又唔會餓死嘅，最多咪做返「二世祖」；更何況，仲有爸爸幫手執手尾呢？就好似波叔咁，明明5、6年前已經話要交畀個愛兒接班，點知年屆86歲嘅佢，今日仲要為個仔頻撲，幫手搵人接貨籌旗，仲幫佢放晒聲氣出去同人講，「係啊，真係搞唔掂」，連「告急」都幫個仔做埋，所以你話，港姐、警察係「絕世筍工」？喺「兒子」面前，全部都行開啦。
後記係：「寧做二世祖，莫做敗家仔」呢種傳統智慧真係好有智慧，一個二世祖，一個月使1,000萬好未？一年先係1.2億；不過敗家仔瀨一瀨嘢，閒閒哋就幾百億，屈指一算，夠養300年。
by千頌C@堆填區
