［Don't Fight the Fed］由Nasdaq 一萬點講到對沖人生
1. TLDR：唔係認叻post．而係記住，都唔使望人地仆街你贏錢。就當你跟大圍，但贏嗰時贏多人少少，輸嗰時輸少人少少。唔只講投資，人生都係。而唔好信咩「1.01嘅365次方，係38」嘅「成功方程式」廢話。你問下講嗰個減過肥未？
2. 其實一早講過，但亦冇乜咁特別。智商正常都估到一萬點。年頭都九千，升10%有幾難？啲網友號稱自己一日都執到啦
3. 不過認真，之前咪有幾日，啲科技股全部受壓，舊經濟股如銀行航空公司走晒上嚟嘅？咁就呃晒。
4. 當然，其實昨晚（星期二）晚都上過一萬點，但收市未能守在一萬點上。又睇下今日晚點。
5. 又，講到尾都係一樣嘢，唔好低估聯儲局印銀紙嘅能力。見到啦？恕我小器又舊事重提，3月尾時講呢樣嘢，不停畀人質疑話聯儲局又唔係發明到疫苗。銀紙救唔到人命。
6. 冇錯，銀紙救唔到人命。但講真，股市真係關心人命？「其實呢，早幾日啲新增確診人數日日新高」，不過out of sight out of mind．
7. 又，升到咁嘅位，其實唔少公司啲估值都唔平下。仲要見到技術上超買（一般唔講呢啲技術分析嘢，但RSI可以睇下），實情，隨時跌返10-15%，有幾奇？
8. 但係喎，又可能升架。股市可升可跌。咁即係係冇講過？錯了。問題係贏面。平嗰時你又唔敢買啫。3月我老母不知幾咁忙，好似我昆人買股票我有得分咁呀（＊），跌嗰時又唔敢買，升嗰時又話升咗，咁想點？最好你買完即升十倍，你沽完即時股災呀可（後者其實係好爽的）
9. 另外，就當然係注碼。係架，你睇Facebook 又好，Nasdaq又好，標普都好，就算用2021 盈利計，都絶對唔平。當你用book value 計，亦都唔平。點計都唔平。甚至恒指都唔平（so sad）．幾時平？3月中同尾咪平。但咪又係誰的老母性感好多人call。
10. 係架，升咗而家先買，就肯定值搏率冇3月咁高。鬼唔知咩。但仲買唔買？都係買。最多細注啲，攤慢啲。冇錯，真係買完後跌嘅機會唔細（主觀諗法），但，你想平啲買？可能永世都唔會跌返去3月中同平嗰啲水平架喎。買有風險，唔買一樣有風險。
11. 所以，有人話我寫嚟寫去，年頭到年尾都叫人買。的確係，你見而家我都仲係叫你買，不過小心啲咁買啫。因為，個個把口講到美帝點勁（事實係），咁點解仲同聯儲局對著幹？呢啲就係inconsistent，虛偽嘅後果（＊＊＊）。
12. 印晒咁多錢，唔係去金融資產，會去咗邊？有冇話你知，亞馬遜上星期發債？（https://bit.ly/2Uy6Lfs）。3年債券，估下幾多息？係0.4厘（＊＊＊）。咁嘅融資成本，做生意梗係發。都未講拎嚟回購添。
13. 所以你需要嘅，只係估下，啲錢會去咗邊。港股？美股？港樓？美樓？黃金？其實如果唔知嘅，咪why not all．資產配置嘛。
14. 再拉遠少少講，鱷少搞嘅All Weather Portfolio ，搞到出嚟，當然同投資者預期有啲分別。但原則上好簡單，亦係所謂「對沖基金」嘅原意—其實根本最初係叫hedge fund，唔係hedge fund．喂，一字之差好遠。你fuck 定係 fucked都係兩回事。亦所以你見「對沖基金」有啲地方譯「避險基金」。
15. 記住名句，至少好長期時間上呢，as far as securities law is concerned, there is no such thing as hedge-fund investing（https://bit.ly/2UvFvhX）。
16. Hedge(d) fund嘅原意，就係馬多夫。應該話，係馬多夫造出嚟嘅嘢。舊文寫過，馬多夫最聰明係，唔會作到啲回報年年升幾成 — 作到咁只能呃你啲網友，但昆唔到超級富豪（https://bit.ly/2Al7n16）（呢篇文其實我好滿意）。
17. 要講一句，貧窮限制你想像力。有錢人要乜？就係要千秋萬代。可以就長生不老（徐福呢啲咪中國定日本定韓國最早嘅venture，集完資著咗草，醒目），唔可以嘅，就富過十代八代，一千幾百年後仲有人記得。
18. 咁所以，有錢人根本唔使同你搏啲咩幾十倍嘅回報—佢身家本身就係你幾億倍啦。佢等於完場領先你3-1，使乜同你搏？攻門都唔要啦，梗係玩角球旗。正如你係落後嗰個，就要打罰規搏三分（OK，忽然變咗籃球場）。
19. 所以，有錢人要嘅嘢，最好就一年升返十個巴仙。夠晒。因為你諗下，佢起碼已經贏你咁多，佢咁樣一年十個巴仙，你永遠都冇可能追到。我畀你有有幾年年有四五成回報，叻仔，多數一鑊就輸返晒。馬多夫就係作一啲咁嘅回報出嚟，呢樣先係最天才！太誇張冇人信，只能昆到啲想一年贏幾倍窮西。但我昆晒你成副身家又點？
20. 呢個亦係對沖基金原原原本嘅哲學，當然而家講呢啲真係好似《大時代》葉天師傅教方展博講「股市原意」咁。但個原意，就真係All Weather，順境時我賺錢—但可能跑輸大市，但唔緊要，我換嚟嘅係，逆境時我都賺錢！唔會三更貧五更富，升三成跌五成。
21. 但，我其實唔只係講投資，係講你成個人生。總有順境逆境，有時係大環境（經濟崩潰，打仗），有時係自己問題（搞咗老細條女，之類），或者只係不幸（忽然大病，親人過身）。要人人輸錢你贏，唔係唔得，但極難。
22. 但可以做到嘅係，順境時，我推得畀別人盡，我贏得多過人（例如轉工，跳草裙舞）。逆境時，我縮得比人地快，輸得少過人（例如奶下鞋底，或者怨少幾句）。呢啲，幾個周期，上上落落後，你就拉開咗同其他人嘅距離了。
23. 可能另文再講，但講定。可能你都聽過，乜鬼嘢勵志方程式（https://bit.ly/3hdLVMj）（電腦大爆炸咩）。1.01嘅365次方，係38。每日進步1%，一年就38倍。0.99嘅365次方，0.03，每日退步1%，一年倒退九成七得返3%
24. 但我可以話你聽，呢啲係廢話，呃鳩人。你日日睇呢啲文，就係0.99啦。根本冇可能日日進步1%，你試下每日食多1%嘢丫。或者掉轉，每日食少1%丫。
25. 事實係，你一般都係365日入面，180日係進步，185日係退步（人生不如意事十常八九嘛，我呢度好保守架啦）。但，可能人地係變做0.99，你變做0.995咁。人地係1.01，你就係1.015咁。幾個周期後，就拉開晒了。
（＊）你可以再睇下用出面一般嘅佣金，你trade幾多股票先夠阿叔打次邊爐。仲要假設我公司會分畀我，而事實係一個仙都唔會分畀我，事實我根本唔會在呢度叫你去我公司開戶口，因為呢個係個人Page
（＊＊）所以國泰發畀政府啲優先股，其實啲息幾高，唔算太搵笨。
（＊＊＊）好似冇乜聽人用虛偽必死呢個角度去講投資？不過應該係有嘅，爭在我未睇過。其實呢個世界任何idea都已經有人諗過，只係嗰個山區嘅大陸仔或印度仔未有機會大紅大紫啫。
———————
版務：收費專欄已減價。支持埃汾高質文章。
一星期三篇，$175睇到6月22號，加埋過去兩個幾月所有文章。
請去呢度訂：bit.ly/2wVXndj
課程編號填: CC01
報完會有email通知，繳費後有Login及Password
逢一三五入去 homebloggerhk.com （入到去就睇到《事先張揚》）
亦睇得返以前嘅文。一般我都係會黃昏出文嘅。
腦攻門市 在 Hanayama腦攻 - Facebook 的推薦與評價
比世足四年一次還要稀有！腦攻全系列買就送超值聖誕好禮 再享1件9折、滿3件85折優惠❗傳送門 https: //bit.ly/3u6Czto 來自日本HANAYAMA腦攻全年齡益智玩具 ... <看更多>