關於 蔣志薇幾歲 ，我們在網路上蒐集到這些相關的討論、資訊與評價

《像我這樣的人》

♂：早晨

♀：早晨……我終於收工喇……

♂：如果尋日唔係陪我既話，你應該唔會咁攰

♀：唉，本小姐最大缺點就係應承左人既野一定會做到，你點啊，今日心情好返未？

♂：尋晚我都無訓到

♀：……為乜呢？

♂：我一直都聽緊首歌《像我這樣的人》

♀：所以你自怨自艾左一整晚？

♂：我一邊聽一邊寫野，諗左好多野

♀：如果你同我講你係覺得自己好可憐好廢好慘的話，我會睇你唔起

♂：我比起好多人都幸福，但廢呢樣野我認既，我諗緊點樣先可以唔再廢落去

♀：你既決定係一直寫？寫到通宵唔停？

♂：你覺得我係咁傻既人？咁迫自己無好處，通一個宵好似好浪漫咁，但我唔係想用呢種方式去表達自己好努力

♀：哦……咁就好，點解要通宵，因為你訓唔著？

♂：唔係啊，我好眼訓，因為你開通宵，我都想開通宵，同你個時間同步，唔係我訓左，你今朝收工返去訓，我又同唔到你傾，不如等埋你一齊訓，咁大家一齊起身咪可以傾多少少

♀：原本我想鬧你，但依家我係街笑到成個癲婆咁

♂：原來你覺得我咁幼稚既！

♀：你係幼稚，比起你阿哥

♂：喂，你知我最憎同佢比

♀：所以我咁講，先最有效果，你話你地條命唔同，佢係順過你好多，但你地兩個既能力，我覺得唔會差太遠，你愈唔想同佢比，就愈放棄自己，問題係，你還你，佢還佢，你依家係未盡到你最大能力

♂：我知，我仲知佢從來都無放我係眼內，佢一直都係做自己想做既事，而我就係執著同佢唔同，最後反而比佢牽住走

♀：我家姐佢眼角高到上天，但佢都會揀你阿哥，就係覺得佢好有自己一套

♂：你會唔會同你家姐比？

♀：有邊個做細既，唔會同大既比呢？我話無就呃你啦，但至少我唔會服輸，所以我一直都好努力做好自己

♂：可唔可以問你點解咁睇錢

♀：我媽係我好細個既時候走左，當時要醫佢，一個月藥費三萬，我老豆係普通人，雖然都有積蓄同保險，但只係捱到三年，三年就一百萬喇，然後就要賣樓，我媽一年就唔再醫，佢話自己好返好多

♂：一定係唔想你地負擔太重

♀：係，大家都知，但大家都無辦法，係沉默中大家接受左呢個決定

♂：明晒

♀：當時我六歲，但我個陣就知道錢可以買到人命，錢可以買到快樂，錢可以買到好多好多野，所謂錢唔係萬能，但無任何野係絕對，錢已經係最接近萬能既野

♂：你咁睇錢，我知道一定有故事，睇你衣著同習慣又唔似係好大洗既人，但你又真係好勤力，咁一切都講得通了

♀：人可以唔志在錢，但唔可以討厭錢

♂：以前我都幾討厭，因為我媽好睇錢，但尋晚既事……

♀：凡事唔怕遲，大把人大器晚成，拿，最高記錄應該係姜子牙，八十幾歲先出名，你仲有大把時間！

♂：我記得你之前同我講，話我同屋企人講你係我女朋友，當時我都無為意，原來你一早就收到風，尋晚我幾尷尬

♀：呵，我幾時認過係你女朋友！不過我幾體貼，比左張體驗卡你，等你好落台

♂：你家姐同我阿哥，你同我，都真係緣份黎

♀：喂，輸人唔輸陣啊，依家我同你暫時結成聯盟！！！

♂：同盟卡啟動！

♀：你依家同我好好地去訓，唔好捱壞，清空個心態，我地訓醒再努力！

♂：咁……晚安

♀：點解要點點點？

♂：因為我諗緊應該講早晨定晚安

♀：晚安好d，我鍾意你每日講早晨同晚安

♂：好，晚安！

#長傾不見 #好久不見 #蔣薇

《無人之境》

♂：早晨

♀：早晨

♂：尋晚我一路聽緊無人之境

♀：One of my favorite song

♂：係Youtube睇住留言，收看次數九百一十一萬，係欣賞，係讚同，定係悲哀

♀：有次我地傾過西遊記，最初至尊寶愛上白晶晶，認定廝守終身，非卿不要，但偏偏又遇上紫霞，其實咪又係一場無人之境，要數呢類型既電影，鐵達尼又係，志明與春嬌又係，連港女最愛單身男女都係

♂：一生一世，一心一意唔係易事

♀：從來都唔易，所以真愛值得珍惜，就好似倖存者偏差咁，我地永遠只睇到成功既例子，但失敗既人更多

♂：早排我睇左阿女又戀黎，入面班家長有個有趣既討論，就係如果個女婿出軌，原唔原諒，有個外父話睇下咩情況啦，如果係一次既，佢又知錯，咁可以原諒既

♀：我都有睇，跟住佢老婆反晒白眼嘛

♂：當時我諗，世伯你一定係個有故事既人

♀：世伯講左句，今時今日世界太多誘惑，我認同，所以錯既機會好大，我都有諗過，如果我老公同我行到六七十歲，然後佢出軌，咁我會唔會原諒佢呢？

♂：答案呢？

♀：我諗我會原諒佢

♂：已記低

♀：所以你覺得可以好好運用呢次機會咁話嘛？

♂：無，純粹覺得呢個答案係個好題材

♀：世界從來都唔係黑同白，你有冇睇大丈夫？

♂：One of my favorite movie

♀：第一次我覺得，偷食都咁多花樣，講得咁理直氣壯，但再睇，我就覺得，佢地其實都好可悲

♂：可悲位係，佢地應該要離婚，但又無離婚，最慘就係夾左係中間

♀：面對誘惑，面對慾望，有幾多人可以完全堅定，人其實說白少少，係滿口道德既動物，動物直接面對慾望，但人就係當中掙扎，一邊想做人，一邊發現自己同動物差唔多

♂：人同動物最大分別係，人同動物都會想，但人可以選擇唔做

♀：鍾意同埋愛既分別係，鍾意係以自己為先，愛係以對方為先，好簡單，愛對方諗起對方會受傷會悲傷，你自然就唔會做；但鍾意，一睇自己，自己要就去啦，自己緊要得多

♂：但人人都係愛對方先同對方一齊同結婚啦

♀：我認為好多人唔係絕對愛對方，記住無黑同白，鍾意同愛係可以夾雜，係講比例，愛佔大多數既人就無咁易出軌，但佔少數既人就好易墜落喇

♂：你愛唔愛我？

♀：你覺得呢？

♂：我印象中你無講過愛我

♀：我更無講過係你女朋友

♂：慘喇……我通知晒咁多人，今次真係柒到喊喇

♀：咁啊，你聽日答我一個問題，你覺得好感、鍾意、愛呢三樣係有乜分別，答得我滿意既，我可以比一張一日女朋友體驗卡你

♂：請問體驗卡包咩

♀：所有社會共識上女朋友有既野都包

♂：睇黎呢條問題唔易答喎

♀：我期待你既答案

♂：我可唔可以提個要求？

♀：講

♂：你準備定你既答案，我想對答案

♀：好，本宮答應了，退下吧小艾子

♂：喳，娘娘晚安

♀：晚安，明早準時服侍本宮

♂：遵命！

#長傾不見 #好久不見 #蔣薇

《蔣薇來年寫作計劃》

同讀者們匯報返書展情況先！

《老婆最後的十二個難題》銷量147本，《弊傢伙，我女朋友有咗》銷量53本，《同學會重遇的那個人》銷量34本。老實講，你好似覺得好少，但已經比我預期中好，真係無志氣都要咁講！

書展既好處係，我終於見到大家了，有人山長水遠排成個鐘入黎特登買我既書，簽名之餘，都不約而同地同我講，唔好燒書，唔好放棄，你真係寫得好好，你唔係垃圾，每一位書展鼓勵我，或者PM同我分析點做得更好既讀者，同埋係訂書表上面留言既讀者，我都好記得你地每一番話！

放心，我唔會燒書，因為我一直都係用銷毀……即係回收或者堆田……講真我唔知咁大批書可以係邊個位燒而唔犯法……

我一直都好憂慮，咁賣唔去既書，可以點算好，但我決定，下年，我希望可以自己租一個書展攤位，繼續賣我既書，同時見下大家，同你地傾多幾句！

當然……租攤位唔平，如果一年一本書而係書展租攤位的話，係另類花式自殺，到時又要求救，又要告急，呢件事實在係太差，所以為左令下年書展我可以自負盈虧，我決定要瘋狂寫書，一來令更多新讀者加入，二來，令舊讀者想支持，都可以有多少少選擇。

其實過去兩星期，我已經測試過自己既能力去到邊，一日可以花幾多時間，寫到幾多字，題材同舖排上可以有咩進步，而兩星期我發現，當我唔打機，真係寫到唔少，粗略估計一日都寫成四千字，當然係寫到成兩三點先訓到個種啦。

唔知大家有冇留意，呢排我出文既頻率係明顯快左同密左，最高峰係一日四篇……

因為我想測試下，出密左，唔同時間出會有咩效果。

有跟貼我既讀者應該都睇到，依家每朝八點，我都會出《長傾．不見》，呢個係新嘗試，我有諗過其實每日返工大家都會睇Facebook，如果有一篇輕鬆而節奏明快既短文睇，會令一日既開始增加一點快樂，所以，《長傾．不見》就應此而生，暫時都比我預期中多人睇，因為純對話既模式同其他傳統小說好唔同，而每一回主線上既推進只係得唔到一成，亦需要讀者好細心先會感受到男女主角感情之間既建立，希望大家喜歡，記得，每朝八點，不見不散！

而晚上連載既《離婚挽救系統》，因為劇情要求比較高，但我都可以維持到兩至三日更新一回，每回差唔多三千字既份量，呢一個寫寫下變成兩性關係冒險故事，都係我既新嘗試，比起大家認為我寫開既都係沉重既故事，睇落會令你臨訓前睇故事，會有一個較好既睡眠，呢個故事我會係完左鐵達尼篇之後暫定一下，下一個電影世界，亦已經確認左，比起鐵達尼，呢套電影大家應該更熟悉！

至於中午，大家應該留意到，我上載文章既時間都係大約一點半左右，點解？因為係我中午食飯時間寫既，通常以散文同短故事為主，呢個時段就要睇個日忙唔忙而定，估計一至兩天一篇。

書展令我改變最大既係，有其他作者睇到我Facebook既忐忑，都黎安慰我，佢地話，其實你真係好鬼勤力，比九成作者都寫得多，我笑左，係，最近係寫得好多，但一來推書，二來唔忿氣，想衝埋今年，而問題係，我真係唔知情緒化既自己可以頂幾耐，會唔會有事突然潛水。

佢地幾個都建議我，不如你開個Patreon啦，睇到呢度，請大家唔好禁走住，睇埋落去先！

係，Patreon我好早就知有呢個平台存在，我亦有諗過要唔要開，但當時我無開，作為一個極不穩定既作者，無收大家錢，我大條道理唔寫就唔寫，但收左錢，就有一個責任要去完成自己承諾既事，無籍口逃避。

但佢地話，其實當你見到有人訂閱，你會知道有人睇，增加少少收入之餘，亦可以令你知道自己既作品係有人肯真金白銀去支持，動力自然就會多。

而我諗返起最近既碼字生涯，平時其他作者可能一個月更新八至十次，而我其實依家都差唔多每日兩更啦，點會做唔到呢？

問題係，我依家係免費，有好多睇緊而連載緊既故事，如果突然要收費，將心比己，我做唔出，所以我考慮既係，我有冇能力係現時更新之上，再加上一個付費項目呢？

答案，係得既……你地唔知，除左早晚連載既故事之外，其實我偷偷寫完一個完整故事，仲有一個開左頭，寫好晒大綱既故事……貨，我依家真係可以講句……我大把。

所以，我決定開Patreon喇！

首先，我強調，我都係收Like同Comment既！！！！所以一眾CD-ROM係下年書展前，你地都可以享受到以下既野：

１）每朝八點《長傾．不見》
２）中午不定期，散文、短故
３）長篇故事連載《離婚挽救系統》
４）即將上載新故《是我，殺了XX》（暫時保持神祕）

而成為付費用戶可以享受到咩？

１）完整小說《二十四歲的特首》，呢個故事係Patreon用戶七月及八月份專享，九月會下架
２）長篇故事連載，優先看，你會比Facebook用戶早一日睇到新故事內容
３）長篇故事番外篇獨享，每月四篇
４）絕版故事網上版，包括《那天，我出席了一個葬禮》《南極》《港女辦公室》《MenClub專欄文章》內容起過三十萬字
５）新篇故事《是我，殺了XX》第一至三回優先看，故事將會於稍後上載Facebook
６）三個月訂閱用戶，均可收到我的獨家實體禮物（七至九月份為２０２４年七月一日的報紙乙份）

上述所有內容，我只可以講，係我花左無數個夜晚寫出黎既心血，Patreon的內容尚未完全上載，正不斷上載中

Patreon獨家訂閱，每月只需美金１２元正！

１００蚊，對於你黎講，可能只係一餐晚餐既價錢，但對於作者講，只要有三十個訂閱，就已經為作者提供溫飽，令佢既文字得到價值！亦有機會令一個作者，成為真正可以依靠文字生活既全職作家！

同時，我亦會上架真人版《長傾．不見》，訂閱用戶可以得到一小時《長傾．不見》體驗，由男主角親自回覆，題目你定，保證度身訂造，同時，會有《長傾．不見》對話外既故事，而呢個將會係書同埋Patreon獨家，不會上載Facebook

《長傾．不見》體驗版，只需美金８元正，換算返只係比最低工資高少少，我真係當收人工做Freelance傾計，字數方面……我出名長氣，分分鐘多過我打一篇文既字數！

暫時我只係開放兩個計劃，稍後既寫作計劃，會係Page同Patreon更新！

可能你會猶豫，到底值唔值，我可以講既係，覺得唔值，我願意退款……而呢個價錢，比起每月賣相既網絡美女，十幾張相就收５０美金，甚至１５０美金……我覺得，我值得過佢地囉（雖然我唔會露點）

你既支持，係我下年書展印書同開攤位既資金來源，如果你享受實體書，希望你喜歡既作者可以一直寫落去，我衷心希望，你成為我既訂閱者！

重申，免費內容不變，一路走來，你地支持我咁耐，我唔會同你地講要錢先睇到文，我收錢，只係用更多私人時間，去追尋一個全職既機會。

好，連載如下：