【《花木蘭》上映無期，《新異變人》離奇地成為終極希望】
一夜之間太多消息，花咗少少時間整理，俾大家最新消息，希望大家睇曬。
一如所料，伴隨《TENET天能》無限延期，跟住嘅《花木蘭》都喺迪士尼嘅映期撤走，即使大陸戲院開得返都係咁話，意味住暑期檔正式冇曬大片。明白香港同台灣應該冇乜人care《花木蘭》，但呢個都叫做「全球影業最後希望」，見到佢冇埋，都有少少無奈。連鎖反應，北美戲院本身冇「老蘭」都希望有「非非」，搞到AMC都宣佈會延期重開旗下戲院。
同時，《法蘭西諸事週報》都冇咗最新映期、原本預計2014年上映，但拍極都拍唔出嘅《阿凡達2》都延期一年，連帶後續嘅《阿凡達》同《星球大戰》延續三部曲都一路延期多一年。
如是者，目前第一「叫做」大片，就係剛剛喺Comic-con宣傳嘅「永恆Coming soon」《新異變人》，映期都仲係8月27日，而《黑寡婦》同《靈魂奇遇記》，都依舊如期喺秋季上映，希望冇受影響。如果唔計《新異變人》，第一套意義上嘅大片，應該係九月嘅《皇家特工：第一任務》。
因為迪士尼一堆戲延期，原定2021年11月上映嘅《蜘蛛俠》第三集都會延期一個月，到2021年聖誕檔上映，食咗《阿凡達2》個期。
那邊廂，派拉蒙嘅《無聲絕境II》撞正疫情初爆，原定喺3月尾上映，先延期到9月初，最後都延到2021年4月。最癲嘅係連《壯志凌雲：獨行俠》，原本係6月上映，先延期到聖誕檔，仲有半年好似唔多對路，都延到明年暑期檔。
不過，一如華納對《TENET天能》嘅態度，目前迪士尼同Sony都表示，以上映期只係針對北美市場，到底海外市場會唔會早一步上映，暫時仲係未知之數。
較早前北美影業都有人講過，如果再冇大片支撐戲院，好可能將唔會再有「戲院同業」呢回事出現。當全球戲院，唔單單係北美戲院，都等緊一套荷里活大片去救票房時，大片一直遲遲唔上映，戲院冇片源又捱唔得幾耐，終歸呢個有雞先定有蛋先嘅問題，可能真係會令大家一齊攬炒...
世界局勢變得一發不可收拾，疫情又好、政局又好，唔好話明年，連下星期發生咩事都冇人知，分分鐘2021年世界滅亡定開波打仗都未知，希望一切可以回歸正常啦。
對於香港觀眾而言，唔好講咁遠，戲院重開上咗套《屍殺半島》先啦...
所有荷里活大片延期最新時間表可看留言連結。
【‼️留意‼️】
「晞。觀影記事」Patreon加強版已經開幕，更多精選深度獨家電影文章，請即訂閱：https://www.patreon.com/travelerwithmovie
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
【IG請follow】www.instagram.com/travelerwithmovie
