（八十五）主子不見了
我有個friend洛宜，佢嫲嫲係一個神婆黎。
佢當時仲好細個，七、八歲左右，佢呀媽一早就無再返黎呢個屋企。洛宜同呀爸，嫲嫲，一家三口住晌愛民村。關於嫲嫲，洛宜唔係了解太深，嗰時淨係知道村入面嘅街坊街里有咩古怪野，例如燒衣應該買咩？新屋入伙拜四角要點做？個仔突然發燒頭暈身㷫係咪瀨咗野？都會敲門黎問下嫲嫲。
洛宜對嫲嫲嘅記憶其實幾模糊，始終果時仲細，但以下呢個經歷，係佢對嫲嫲印象中最深嘅一件事。
洛宜屋企有隻貓仔，叫麥皮。
麥皮八個月大嘅時候畀主人棄養，好彩有洛宜。話說有日佢同老豆放學返屋企果陣，見到公園垃圾筒隔離有一個大紙皮箱，佢離遠見到紙皮箱震震下，覺得奇怪，就走過去打開一睇，竟然見到有隻細貓仔晌入面，側邊仲放咗少少貓糧，相信係畀人狠心掉咗出黎。(棄養真心曲街）
洛宜見貓仔好可憐，係咁哀求老豆，要帶佢返屋企，自此，貓仔就搵到戶好人家喇，仲有個名叫麥皮。
洛宜好錫麥皮，盡心盡力去成為一個好奴才，麥皮亦都好乖，好鍾意捐入被竇埃住洛宜訓。 .
但係有一日，一個唔為意，麥皮從大門口祟咗出去，麥皮走失咗！洛宜跑落街係咁搵係咁搵，都唔見麥皮蹤影，佢好徬徨，老豆夜晚放工返黎又再帶佢周圍搵，都係唔見。
一日，兩日，麥皮已經足足唔見咗三日。洛宜日日以淚洗臉，成個人落晒型，唔食野無晒心機，雖然心入面唔想承認，但已經預感麥皮呢次兇多吉少。不斷諗：「佢無野食無水飲點算？佢仲咁細隻點識照顧自己？佢會唔會比d變態虐貓狂捉咗去？」等等等等。
佢好自責，點解自己咁大意，無好好睇住麥皮，會咁易俾佢走甩！
就晌呢個時候，嗰一晚，嫲嫲買咗份衣紙返黎，然後晌走廊燒畀門口土地公，口中念念有詞。然後嫲嫲燒起咗好多香，叫洛宜出黎幫手，一齊沿住走廊逐家逐戶咁莊香畀走廊上面嘅每一個土地公，將穿插上。
之後，呀嫲拎咗隻碗同筷子走出走廊，用筷子係咁敲隻碗。
「叮叮…叮叮…」一直由屋企門口沿住走廊敲到落樓下，其間叫洛宜一路嗌住隻貓個名。
「麥皮，你晌邊呀？」
「麥皮，返屋企喇。」
「麥皮…麥皮…」
完成後，嫲嫲將對筷子同個碗放咗晌屋企門口，隻碗，嫲嫲仲倒咗d水入去。
當時嘅洛宜緊係唔明做緊咩啦，但係有一絲搵到麥皮嘅機會佢都會照住做。
呀！點不知，唔知真係咁靈定巧合喇，第二朝，洛宜準備出去返學果陣，一開門，竟然見到麥皮就蹲晌門口度，飲緊碗入面嘅水。
嘩！呀爸當時都嚇一嚇，估唔到嫲嫲咁堅，洛宜緊係開心啦，即刻狂抱返主子入屋，應承佢以後都要好好照顧佢。
「嫲嫲你好叻呀！」洛宜當時直頭忘晒型咁狂錫嫲嫲塊臉，不斷多謝嫲嫲，嫲嫲摸摸洛宜頭殼，和藹咁笑笑。
呢個笑容，對洛宜黎講，好深刻。
嫲嫲因為老人病晌洛宜十歲嗰陣就走咗，佢地相處時間真係唔算好多，但嫲嫲，晌佢心目中就係一個咁厲害嘅人，佢成日諗，如果自己可以同嫲嫲相處嘅時間耐d，或者就可以聽佢講更多佢後生嘅事跡，相信一定會好有趣。
直到今日，麥皮都十三歲喇，名副其實係老麥皮，但洛宜依然係咁錫佢咁呵護佢，老麥皮亦都好似細個個陣一樣咁鐘意捐入被竇埃住洛宜訓。
有時佢望住麥皮，又會醒起嫲嫲呢件事，又會再鞭策自己：
當自己愛嘅人仲晌身邊既時候，
要努力，用多d時間去陪佢，
要努力，令佢地笑多d，
要努力，去話畀佢知，
我愛您。
.
.
.
各位貓奴，下次如果你咁唔好彩，畀你主子走失咗，不防試下呢個尋回主子嘅民間偏方。不過呢…都係嗰句：想帶貓出街，用貓繩啦喂！
#愛需要及時
#要抱要吻要怎麼也好
#真人真事 #離奇 #鬼故 #鬼 #靈異 #不可思議 #離奇家遮 #恐怖 #文字 #電影 #口耳相傳的香港鬼故事 #貓 #貓咪
－－－－－－－－－－
廣告植入：
《口耳相傳的香港鬼故事 3 - 冥冥．註定》
經已出版，各大書局有售。
