【誠實食後感】KiKi蔥油拌麵
#親生家姐捐畀我 #非自購 #非廣告
話說我家姐上星期日好似嚟探監咁帶咗好多糧食畀我，
其中有呢包KiKi蔥油拌麵。
佢畀我果陣包裝已經爛溶溶同入面都係淨返一個麵咁大把，
真係要好好珍惜呀！
n個月之前都見到好似好紅，而家係唔係無咁矜貴喇？
包裝話佢地啲麵條係手工製仲要「日光乾燥」（係咪等於日曬？），
佢個麵喺「包裝即食麵類」入面算好食喎！
我覺得佢係唔係太幼嘅幼身麵，煙韌、彈彈地牙，食落質地唔似包裝即食麵質地👍
（包裝指示話煮3-5分鐘，我煮咗4分鐘）
但係果包醬料我就覺得只係一般，
打開撈落啲熱辣辣嘅麵到果下都聞到蔥油香味開心咗一下，
不過轉頭食落就無乜蔥油味，鹹就夠鹹，
我覺得似用好味啲嘅豉油撈麵多過似蔥油撈麵😢
有少少失望，可能係期望太大，因為佢一寫「蔥油」，
就會預期佢好重口味㗎嘛！
香港官網賣HK$68一袋 + 另收運費，一袋有六小包，圍返其實都唔算平。
如果淨係講蔥油味，我又覺得未至於要畀咁多錢翻兜仲要等送貨嘅程度。
但個麵條係好嘢嚟！👍👍👍
講開又講，我n年前好鍾意食台灣阿舍乾麵油蔥味，
第一次食真係好驚喜，跟住仲專登喺台灣托兩袋返嚟，
食到最後果包仲會好唔捨得好珍惜咁逐條慢慢食。
印象中佢唔止麵條彈牙，
個油蔥醬包仲要好香！真正有蔥味！
果陣香港未有得買，直到香港都買到，然後仲轉咗包裝，
再買嚟食就覺得佢個醬包唔同咗味😭😭😭
唔知係佢難食咗，定係我大個咗呢？👵
姐，我想試埋老媽拌麵，快啲乞畀我！😎
#妹就是任性
#KiKi拌麵
