Max好鍾意食三文魚，但係我又唔放心俾佢食咁多三文魚（而家呢個年代，乜嘢食材都唔可以長期食用，要分散投資😂）所以，會搵好多款唔同嘅魚俾佢試，銀鱈魚佢都好鍾意食，但係都幾貴😛
上次經過凍肉店，老闆娘介紹我試吓呢隻急凍的Sea bass，平時喺餐廳我都好鍾意叫，但係自己整又真係未試過；磚頭咁大舊$170，見圖二（夠全家食），我覺得都可以吖！
見今日全日落咁大雨，都冇心機出街買餸，一於解凍佢嚟試吓！
通常咁厚嘅魚扒都好難煎，但係又懶得去攞枝慢煮棒出嚟浸，懶媽方法係，魚扒解凍之後加上調味（鹽、胡椒粉、香草等各少許）然後用牛油紙包住放入焗爐，用150度焗15分鐘（對唔住呀！我估之前個乳酪雞胸我寫錯食譜，應該係用150度焗先真！搞到好多人inbox我，焗到過晒火，累大家嘥咗心機添，我過去改返先！😭🙏🏻）
焗完之後打開，就係圖三咁嘅樣。
之後，用牛油開鑊，用中大火先煎魚肉嗰面（約30秒），然後反轉煎香魚皮嗰面至金黃色，就可以上碟啦！
#記得呢個做法只適用於磚頭咁厚嘅魚扒 #如果想健康啲焗完已經食得 #不過再煎香佢層次又會豐富啲
#難極有個譜系列
