https://bit.ly/2Pkyror
康宏AGM大龍鳳：正義超人謝偉俊慘被冼國林師父驅逐離場／著名藍屍KOL竟為台灣幫打擊深圳幫？
你永遠估唔倒康宏風暴有幾Juicy。有關康宏理財股權爭奪戰單嘢，由於我之前已寫過好幾篇分析，所以呢度就唔再覆述。但今次又要再提番單嘢嘅原因，係由於掌控住管理層嘅「台灣幫」一拖再拖後，終於響3月18日舉行股東大會(AGM)。
其實先前EGM已出現過暴力衝突火藥味甚濃；咁今次AGM其中代表小股東嘅正義超人謝偉俊，就打算前往出席交涉。點知一去到會場，就比一堆來意不善嘅「保安」訓斥驅趕落樓，當中包括戴黑色口罩嘅「冼師父」冼國林。即係如果大家有睇新聞直播，就知場面有幾混亂：「台灣幫」一批「保安」唔單止兇神惡煞咁趕走任何響佢地眼中「不受歡迎人士」，而且仲要當差佬表明身份上門執法之時
「我而家警察呀！我而家執法呀！」
「差佬又點樣呀？我普通市民呀！」
果種勇武法，唔係冼師父在場，爭啲令我搞錯以為係前線手足！
冼國林師父本身就係一個傳奇人物。除咗身兼香港詠春同洪拳主席，又曾經係上市公司高層。又先後進修過銀行同律師專業課程，能文能武──不過要講到近年最出名嘅，自然係其中一個最受歡迎嘅撐警藍屍KOL，唔單止持續發表撐警鎮暴言論，甚至以Fake News抹黑香港司法及港台以向國家表忠。今次佢同謝偉俊衝突，可以話係名符其實嘅「愛國陣營內鬨」。
但奇怪嘅地方亦正係響呢度。今次冼師父協助護航嘅「台灣幫」，背後同富邦蔡氏家族有千絲萬縷關係；既然講到自己咁愛國愛港，點解會企響台灣幫果邊倒轉槍頭打番康宏另一重要股東「深圳幫」，咁仲點配稱為「愛國者」？
冼師父自稱並非康宏股東，但在場竟然以惡劣態度驅趕其他股東代表，其實佢憑咩唔比人入去？甚至差佬上黎執法都被你班人兇番轉頭，咁仲點叫「支持警方嚴正執法」？冼師父「見義勇為」協助當日維持失序，又仆心仆命為咗確保股東大會不被異議者干擾，咁我只能夠以「兼職睇場」一職作為解釋。
好笑嘅係，冼師父接受傳姀訪問時又要響批評馬時亨時加多句：「顛倒是非，令人懷疑係咪現時香港可以靠打人去達到目的。」，喂，而家兇人果邊好似係你台灣幫嘅人bor……
我非康宏股東，又非愛國藍屍，對於建制內鬨當然係抱食花生角度欣賞，只係冼師父今次勇猛表現卻令有兩個感想：一係金錢面前，民族大義都要擺兩邊；二係重賞之下，藍屍同樣可出仇警勇夫。
