【節錄自《#碌葛男人嫁得過》by #賭Sir — 撰於2018年 】
《有大學讀 唔通唔讀？》
賭Sir我真係阿Sir嚟，我教數學補習。每年中六放榜，都有學生好頻能，分數中中庭庭，高不成低不就，究竟讀大學？抑或搵工？賭Sir我又要化身顧問。
「夠分梗係讀啦！唔夠咪搵工囉！」有啲社會碌葛係完全唔理解仔女嘅人生交岔點喺邊，深信學歷高前途好。
伯母，今時唔同往日啦！喺香港地，唔夠分都有得讀，夠分唔讀亦無妨。
點解唔夠分都可以讀呢？因為有樣嘢叫副學士，即係未算學士，但可以讀住一兩年先，成績優異就可以駁返上大學，真係讀學士。
夠分又點解唔讀，要走去搵錢呢？因為學歷膨脹，沙紙唔值錢，以前大學生吃香，源於物以罕為貴，依家周街都大學生。莫講話學士啦，博士都大把！
新一代人，有新嘅顧慮：「媽咪媽咪，學歷高係咪真係前途好？大學係咪真係值得讀？」
嗱！【讀大學】嘅優勢、【唔讀大學】嘅劣勢，唔使我講你都知。以下嘅篇幅我會反過嚟講下【讀大學】嘅劣勢，以及【唔讀大學】嘅優勢，計吓條數，將現實世界嘅真象，客觀而全面咁分析出嚟。
【讀大學嘅劣勢】
若然不幸入到大學，每年學費$4萬，四年制順利畢業盛惠$16萬，榮升債仔。萬萬聲，仲以為打麻雀。
打咁多萬子，贏到啲咩呢？贏到張沙紙，成為大學畢業生，好嘢！
根據香港政府2018年嘅統計數字，全港720萬當中，有120萬人係學士或以上，即係每6個就有1個。
每6個人就有1張嘅紙，有咩咁值得別人優待？真係值得花16萬去成為骰仔6面之中嘅其中1面？
以前矜貴唔代表永遠矜貴，用以前嘅價值衡量依家嘅嘢，只有社會碌葛先會咁碌葛。思捷環球2007年股價$133，依家值$2.1。你依家係咪肯用$133去買？社會碌葛就係肯。
【唔讀大學嘅優勢】
若然醒目唔讀大學，首先梗係慳返$16萬嘅學費先啦！
唔好話我市儈，呢筆數都唔少嘢。2016年香港嘅大學畢業生月入中位數只係得$13883（仲未折算返通脹，都竟然仲低過廿年前1996年嘅$15404！）中位數嘅意思即係月入$13883已經搵得多過一半嘅大學畢業生。將月薪乘返12，計返年薪，恰好就係$16萬幾。
慳返$16萬，等同於你有條大學畢業嘅奴隸，每日返工忽必烈打仔－－大汗疊細汗，捱曬騾仔，每個月頭畀曬成份糧你，全數進貢，十十奉獻，磅水磅足12個月，爽唔爽？
慳返筆學費都事小，慳返4年時間事大！
早4年投身社會，了解社會運作，發展學術以外嘅一技之長，見識世面，擴展人脈，甚至搞下生意等等，讀一世書都學唔到。就算唔講呢啲虛無縹緲嘅優勢，我就繼續實實在在咁講返嗰$16萬學費。
$16萬學費，配合投資，4年可以變成幾多？
以下會用 #社會精英 一致睇好嘅 #比特幣（#Bitcoin）換算一下。公道起見，我當喺首次泡沫嘅高位買入，再喺最近中美貿易戰谷底微彈嘅價位賣出，折算返盈利率。
2011年7月，比特幣經歷首次泡沫，由幾蚊美金升到$31美金；
2018年7月，比特幣經歷巨型泡沫，由萬三蚊美金，跌返落$6387美元。
經歷7年，比特幣總共升咗【6387 ÷ 31 = 206倍】；
換算返每年平均升幅【206^(1/7) = 2.14倍】。
$16萬投資比特幣，4年後變成【$16萬 × 2.14 × 2.14 × 2.14 × 2.14 = $336萬】。
一般大學畢業生要幾耐先儲到$336萬？$16萬，提早4年投資，複式計算嘅力量好大！
【一個重要的反駁】
「賭Sir，估唔到你咁市儈囉！讀書求知識、造學問嘅嘢，邊有得用嗰幾百萬臭錢去衡量架？」呢個問題係社會碌葛嘅最後一道防線，我依家就刺穿埋佢！
大學生走堂如食菜，圖書館亦可以唔入，書都唔使鋤。閒時做功課，參考師兄師姐以前嘅答案，俗稱爬Source。想考試過骨，刨下教授上堂嘅PowerPoint，背下啲Past Paper答案，搞掂。
當然，又唔可以怪曬大學生，事關好多大學教授都教得好Hea，棟篤企喺度照讀PowerPoint飛Slide，又怕出卷太難，學生會畀負評，影響續約，功課考試都唔敢大改。
以上純粹個人偏見，但讀過大學嘅讀者相信都心照，似返個讀書人嘅同學，真係佔大多數？
最終，有心讀書嘅，都係靠自己去圖書館或者上網研習，所以，係唔係大學生根本影響唔大，升唔到大學嘅，同樣可以去圖書館，或者上網自學任何知識。
終極反問：其實大學嘅課堂絕大部份都歡迎旁聽，劍橋哈佛牛津嘅完整課堂甚至可以喺網上睇，若然一心求知識、造學問嘅，使乜讀大學？隨時可以上，仲要慳返筆學費，點解唔咁求知？因為無沙紙。
不認不認還須認，社會碌葛讀大學，最主要就係買沙紙，造學問只係可有可無、隨緣不強求嘅副產品。
【公道比較】
換言之，讀大學唔一定有知識。同樣地，讀大學雖然唔可以全職返工，但亦可以兼職，唔一定無工作經驗同人脈。要計算大學抵唔抵讀，應該咁樣分析：
※【讀大學】 = +沙紙 + 4年兼職 - $16萬學費 - 4年時間
【唔讀大學】 = +4年全職
社會碌葛決定讀大學，只會諗：有咗張沙紙，$16萬學費畢業後總會賺得返。但事實上，應該係咁比較：
【讀大學】 - 【唔讀大學】
= （ + 沙紙 + 4年兼職 - $16萬學費 - 4年時間 ） - （ + 4年全職）
= +沙紙 - $16萬學費 - 4年時間 - 4年全職與兼職的差額
要得到一張大學沙紙，除咗要付出$16萬嘅金錢成本，仲要付出4年嘅時間成本，以及4年全職而唔係兼職嘅工資差額（以及經驗），即係機會成本。
若然利用傳統經濟學嘅思維，夾硬將時間成本同機會成本變曬做金錢去衡量的話……
首先，4年時間，可以將$16萬投資滾大，就算唔夠眼光投資比特幣（變$336萬）而只係保守地投資「終極大籃籌」港鐵股票：
2000年11蚊，2018年44蚊，18年升咗4倍，平均每年升咗【4^(1÷8) = 1.08倍】
即係平均每年升8%，仲未計股息。
$16萬投資港鐵，4年後變成【$16萬 × 1.08^4 = $22萬】
至於全職同兼職嘅工資差距，我攞個大概：全職每月萬幾，兼職每月幾千，就當差距$1萬，日積月累4年已經$48萬。
（你可能反駁：兼職未必每月得幾千，筆者未畢業亦每 月幾皮，超過港人月入中位數，但記住我計嘅係差額，就算兼職月入唔只幾千，全職一定搵得更多，當差額$1萬唔過份。）
換句話講，保守估計，讀大學嘅成本（機會成本）至少都應該係：
（學費 + 投資機會） + 全職/兼職差額
= $22萬 + $48萬
= $70萬
總結一句：若然你認為大學畢業生嘅身份，可以為你至少賺多$70萬，又或者你主觀地認為張沙紙可以為你帶嚟價值超過$70萬嘅成功感、滿足感、諸如此類，大學絕對讀得過。
查實上述嘅道理，一字咁淺，好難唔明，甚至直頭係老生常談，唔少人都討論過。究竟社會碌葛係憑咩妙計去守住自己個腦，過濾啲道理呢？我教大家兩招：
假設上述嘅道理，係一個無讀大學嘅人話你知，你咁應對：
【唓！你讀唔到大學之嘛！梗係咁講啦！】
假設上述嘅道理，係一個大學畢業嘅人話你知，你咁應對：
【唓！咁你又讀？自己享受完就講風涼話！】
用呢個邏輯，無論邊個講道理，都可以左耳入右耳出，堅守社會碌葛之位。
講開又講，呢一招更可以進一步推而廣之，應用喺任何道理。當成功人士分享成功之道嘅時候……
假設講嘅人尚未成功，你咁應對：
【唓！係得嘅，又唔見你成功？】
假設講嘅人已經成功，你咁應對：
【唓！你都成功咗，講乜都得啦！】
做社會碌葛一定要識呢招殺手鐧，否則呢個世界古往今來咁多至理名言，好容易變醒目。智慧係返唔到轉頭，當一個人叻咗，就蠢唔返。睇路啊！
#有趣統計：
蓋洛普於2013年的《內部高等院校首席學術人員調查報告》指出96%高等院校首席學術人員評價自己的大學院校課程，能好好準備畢業生，進入職場工作。但報告同時指出，只有14%大學畢業生認為，自己在大學所學的，能幫助自己在工作中應用。更嚴重的是，只有11%僱主認為，大學所培訓大學生的技能及知識，能幫助他們的業務發展。
讀書人不吃牛 在 Fw: [請問] 讀書人不吃牛的觀念的由來- 看板ask-why 的推薦與評價
※ [本文轉錄自 ask 看板 #1H70qXA8 ]
作者: nantonaku (祖藍哥哥~) 站內: ask
標題: [請問] 讀書人不吃牛的觀念的由來
時間: Thu Feb 14 06:01:02 2013
小時候聽過長輩說
讀書人因為不事生產，牛很辛苦耕田給讀書人吃到米飯
所以讀書人要有感恩之心 不要吃牛肉
後來有次聽一位教地埋歷史方面的朋友說
其實這是因為中國北方(or南方？ 記不清了)
山的走向 (忘記她是說是南北還是東西) 不適合放牧養牛
所以就有這樣的說法 讓大家不要太想吃牛肉
就可以解決這個「想吃牛但牛肉難生產」的問題了
她說這個在高中課本有寫 可是我都沒找到
不知道版上有大大知道正確的細節嗎？ 很感謝喔 ^_^
--
※ 發信站: 批踢踢實業坊(ptt.cc)
◆ From: 35.13.222.166
※ 發信站: 批踢踢實業坊(ptt.cc)
※ 轉錄者: nantonaku (35.13.222.166), 時間: 02/14/2013 06:05:19
... <看更多>