《強攻亦無助後防連環自爆 西布朗對車路士賽後分析》
.
能夠最終喺人地主場喺落後三球下執番一分離開並唔容易，不過搞到自己處於水深火熱之中其實都係自己一手一腳所造成，亦同時被外界指責無論收購幾多優質前場球員都好，一日唔解決防守上所存在「質」既問題，一日都繼續會出現自爆情況，亦無助有效提升球隊既整體實力。
.
單睇出場十一人既陣容，其實方向上都較為正路，源用4231陣式，攻堅組合依然選用艾巴咸以及身後既夏弗斯兩人作配合，而左右兩翼分別係添姆雲拿同蒙特，中場方面收起左佐真奴選用高華錫與簡迪合組雙中場，而後場方面堤亞高施華首次於英超賽場以正選中堅兼任球隊隊長身份上陣，而拍檔用上上場對利物浦領紅牌既基斯甸臣，左右兩閘就分別係馬高斯阿朗素同尼爾斯占士。
.
喺進攻套路上其實都見到新球員都開始逐步融合於體系之中，夏弗斯擔當為一個半支點類似中轉站既球色，每當高華錫以及簡迪交波比佢之後，德國人都會嘗試轉身推進，如果環境所限而轉身不成的話亦會立即將個波傳到兩翼位置，而喺右邊位置加上占士經常疊瓦式上前助攻，令上半場經常出現夏弗斯、蒙特以及占士三個互相配合走位既畫面。
.
相反左邊既添姆雲拿既表現就較為沉寂，最主要原因係佢身後既馬高斯阿朗素缺乏有力既支援，後者喺開賽初段一次頂失造就對手身入第一球，加上好快就已經比人地用速度硬爆出手而領黃，基本上佢都好少靠前助攻，令添姆雲拿獨力支撐前場左路區域，而及後堤亞高施華於中後場位置控失後被對手單刀射入，再加上占士於防守角球時睇漏人，令球隊早於上半場已經出現三個失波。
.
針對於哩三個入球，其實都依舊一貫係個別球員既個人失誤所引起，林伯特實在有必要加強球隊喺比賽時間既集中力，而喺落後三球底下亦喺下半場相繼換入進攻球員力追入球，老實講章法就真係無乜，都係攞大個頭焗攻希望拎到一分落袋，所以下半場既戰術套路係無乜太大參考價值，因為球員啲企位變化都相當大，一時企左邊又一時企右邊，無乜一個好貫徹執行既進攻套路睇到。
.
其實早於上半場艾巴咸同添姆雲拿都各有一次黃金機會，但雙雙都未能把握錯失追平機會，幸好下半場出到黎蒙特以一記世界波打破僵局，否則以場面黎講都仲有排拖拉落去；論表現球隊今場一定唔能夠以好黎形容，不過季初遇上考驗總比季中時先發現問題好，至時仲有時間可以作出改善，加上一早已預期球隊喺季初哩十場八場波既表現都比較反覆，亦理應比多些少時間球隊去作出調整。
.
《岩睇既比個Like支持我地啊！》
作者 : BluexLion車迷手記
-------------------------------
同場加映《引兩名德國隊友加盟自己卻反被開刀 魯迪加慘遭林伯特「用完即棄」？》
https://bit.ly/3j2ecpz
.
#Chelsea #車路士 #西布朗 #英超
