關於 阿豬投資班 ，我們在網路上蒐集到這些相關的討論、資訊與評價

［呢期興上台講感想］實在Speak for itself。話有幾多人睇都係假，叫到科水個個口爽荷包立，人之常情。咁有成千人肯畀錢訂Patreon，都係一種成就，照計唔係貪我靚仔。寫得好唔好？你話呢？（https://bityl.co/4Y0h）

1. 多謝所有join咗嘅讀者。當然冇join嘅都多謝，join埋更好。天時地利人和。除咗多得我自己寫得好（請睇多次最頂一段），同各位讀者（無論有冇付費）識貨外。我仲想多謝：

a. 朱生。冇Facebook我點會有呢啲嘢？所以啲人走去鬧Facebook冇畀錢佢仲用佢啲嘢，十分搞笑。有冇睇《雛妓》？（好似套戲講Start up的）

b. 都係朱生。以小弟Facebook Page 1.4萬 Page Like，但Patreon可以過千人，稍為有常識嘅都話你知個conversion rate 高得不尋常（請睇多次最頂一段）。咁除咗係Facebook Page啲讀者loyalty 夠高外，亦因為—我洗咗唔少錢落廣告。而係有用的。孤寒一萬幾千都唔畀朱生賺仲要鬧佢冇畀錢你嘅，就求仁得仁啦。

c. 聯儲局主席鮑威爾。講乜都假，冇佢狂減息狂買債狂印錢，股市未必咁好。而讀者好現實，升市人人疏爽。大跌市？就算你outperform，寫得再好，搵人科手都係極難。搞Start up嘅都知，2017年之前，錢多人傻。亦因為咁，我2020年十分落力賣Facebook Page廣告。到熊市嗰時就冇人理你架啦。就仆街死財演昆人買股票害人你有冇良心架啦。

d. Jack Conte。乜水？Google啦，我都係Google先知。但應不能漏咗佢

2. 真的，天時地利人和。冇以上三位，我寫得再好，讀者再支持，都未必做到呢啲嘢。謙卑啲，唔好以為自己寫文有幾巴撚閉。人地提供個平台畀你，加埋世界大氣候，水淹七軍（＊）。冇呢啲嘢，話知你天才橫溢啦。三十年前嘅素人作者邊有呢啲luxury？

3. 但亦係我在2020回顧講。機會留畀有準備嘅人嘛。台上一分鐘台下一年功啦。你見個市好呀 嘩 Peter Thiel呀 嘩SPAC呀 先去趁熱鬧左抄又抄想分一杯，人地平時日日練幾個鐘波喎，真係「有能力的人不加班」咩戇鳩。我做十鳩幾年Analyst日日睇咁多嘢，你邊位？

4. 姐係你睇我而家1000人訂。但好多基本盤，都係嚟自我過去廿幾年（＊＊），咳咳，深耕。至少頭廿年，我一個仙都收唔到，仲日日畀人屌老母話你唔撚識嘢阿豬阿狗都寫文仆街死財演叫人買股票害人，好多人又冇睇到啫。

5. 我畀人屌足廿年，一個仙都冇。誠品都只係蝕咗十五年咋！好彩，我加入萬惡嘅金融業，令我寫文之餘有飯開。不過我想講，吳清友搞誠品嗰時，四十歲未夠，已經10億台幣身家，1989年嘅10億台幣！根本係富豪級。

6. 2020年，我過得唔錯。即使年尾被炒，全年我都仲畀自己6-7分。咁已經訂咗嘅，多謝大家。未訂嘅，可以考慮下。繼續唔訂，亦冇所謂，幾時都係隨緣樂助。

7. 不過天地良心，2020年訂咗嘅讀者，佢地都話係獲益良多，絶對抵畀—覺得唔抵嘅，當然就用腳投票退訂，冇人阻你。但，我keep住一個月都唔夠20人退訂。而每個月百幾人加入。呢個churn rate 應該算當低

8. 多謝大家。有啲飛機，但千人斬達成都冇得飛機，唔知等到幾時。好似啲Perma Bear咁等股災等了又等。最慘係等到都冇用。我2020回顧嘅文都有寫

（＊）BTW，平台＋聯儲局，正係呢幾年嘅投資主題，唔好話唔提你。仲去研究咩「經濟仲係好差」「仲係好多人死緊」嘅。得罪講句，2020年你係白過的。亦證明你冇睇本人嘅文，咁當然亦都求仁得仁。You are what you read．

（＊＊）真架，唔好計咩寫週記寫校刊嗰啲。我網上公開寫文，都廿幾年啦。喂而家啲小朋友28歲話自己等獎等咗28年都係咁啦。由出世計起添

你嘅2020年點？我嘅2020年就幾好。Ivan Patreon，港美市場評點，專題號外，每日一圖，好文推介。每星期6篇，月費100唔使，4個月已1000人訂！（https://bityl.co/4Y0h）。月頭訂至抵，年費仲有85折，仲係睇13個月添。

起初我都有恥笑姜濤、Mirror 或《全民造星》班參賽者。

覺得佢哋「咩人嚟㗎、未夠班喎，扮韓星？」，但愈來愈覺得佢哋值得支持。

準確一點，與其話『值得』，我更強烈嘅感受係『需要』。

香港需要一班能夠令觀眾感受到佢哋努力嘅年輕人，呢刻佢哋唱功，演技或有不足，需要好大進步，但至少佢哋會為觀眾而努力去學習。

當大家成日話歌手明星奶共，為人民幣低頭，到而家有班年輕人為本地市場而落力（至少呢刻應該係），應該都值得觀眾們畀個機會。

純粹以寫作人角度去睇，一直好多人都睇唔起網絡作家，覺得阿豬阿狗都出書，但亦有人喜歡貼地共鳴嘅文字，題材有趣，距離好近。當年網絡興起，造就好多新作者、新作品出現，令更多喜歡寫作的人有踏出第一步嘅機會，我慶幸係其中一個。

的確有好多比姜濤、Mirror更好嘅歌手，但天時地利人和都好緊要。而呢排熱話就係《造星》同《男排》，是好是壞，佢哋都帶嚟一番新景象，至少大家會討論，有人重拾追星、追劇、追節目嘅樂趣，呢點佢哋算成功。

你可以唔聽佢哋嘅歌、唔睇佢哋嘅劇，（其實我都冇聽冇睇），繼續支持你認為值得的歌手，但所有天王巨星嘅出現都要時間磨練，呢刻踩低邊一個亦無意思。

反而，姜濤同Mirror嘅成功會鼓勵到更多追夢嘅人，令想堅持嘅人覺得呢個世代都仲有機會，仲可以打破傳統，勇敢多作嘗試。有觀眾支持，電視台或唱片公司先願意做更多投資，先有更多人有機會。

論個人品味，真的沒有誰比誰高尚。聽姜濤可能被Eason粉絲恥笑，但聽Eason都可能被外國歌手粉絲恥笑，而聽外國歌手都可能被聽貝多芬粉絲恥笑，邊個先最有Taste？

幾多曾經被恥笑過的藝人敢企出來發聲，又有幾多我哋欣賞過嘅明星歌手令人失望。

其實我唔係鍾意姜濤Mirror，但更唔想自己接受唔到新事物、新潮流，只係會懷緬過去。

有人批評佢哋，必有不足之處；但有人鍾意佢哋，亦必有值得欣賞嘅地方。

我的2020回顧，寫咗7000字，分上下集。下面會有上集全文，但我建議你去Patreon睇，有埋圖有埋link．放心，呢篇係免費的（https://bityl.co/52Nf）

問我就上集嘅topic吸引啲，但2020大教訓在下集。所以睇晒佢吧。

剛剛下集都出埋，呢度（https://bityl.co/52OG）

另外，2020年雖則在我身上發生好多事，但整體都係不錯。想2021知得更多，同埋助養本人（畀人炒咗啦！），請訂Patreon，一星期至少六篇，一個月一舊水有找，已經近1000人 join（https://bityl.co/4Y0h）

========================================

上集
引言—我的2020，一個字，NBA。真係打籃球嘅NBA
被炒記2.0—生涯第二次
Patreon讀者救我全家，好人一生平安
台證消—本人已拎台灣居留證，一切都係為了這一天
投資 —股票總值升咗100%

下集
冇得一年去幾次日本，但我仲可以外遊兩次
好似同我老母炒咗大鑊
其他—睇書睇戲睇波，冇人想知。
2020教訓：唔好杞人憂天。但機會留畀有準備嘅人。contrarian，不朋不黨，unherd．

1. 2020回顧，寫寫下變咗7000字。分上下集出。另外呢篇文係免費的。表面好似上集好睇啲，但大教訓在下集。所以睇晒佢吧。你仲未訂Patreon嘅，即刻去吧，月頭訂抵呀。（https://bityl.co/4Y0h）

引言—我的2020，一個字，NBA。真係打籃球嘅NBA

2. 一個字形容我嘅2020？就係NBA。真係籃球嘅NBA。咩意思？籃球L勿鬧，好可能基於我錯嘅印象：但即使我青春期啲朋友一定一齊睇，我就一路唔太鍾意睇NBA。因為發現，總係睇最後一節就得，我睇都係最後一節先開始睇。最後一節，總係能人所不能，好似幾多分都會追到，又幾多分領先都會被人反先。感覺好似頭三節熱身咁。當然事實可能唔係（歡迎拎數字講），但你應該明我講乜。正如足球賽事，都有統計，補時嗰幾分鐘，入球量不成比例地超高。因為防守嘅冇力，落後嘅豁出去，而又有時畀人打反攻。

3. 2020，原本是如此美好。C’est bon．但下半年比較多事，特別係12月。如果呢個回顧在11月做，應該會幾唔同。

4. 成個2020年，我自己打分，應該係6-7分。但如果11月尾打分，會有7-8分。

5. 2020對大家嚟講，兩大件事，可能係肺炎，同埋國安法。但講真，帝力於我何有哉？我又唔係東渧汶人。唔係冇影響，但如果我拍戲嘅導演，我都係拍小人物嘅故事，細節你咪會睇到。甚麼人類福祉呀命運共同體呀香港已死呀，講真，I couldn’t care less

6. 而舊文都講過，我呢啲情況，人大咗，冇小朋友，又唔係搞生意，真係冇乜好寫的。搞生意嘅，每年講開分店新產品都得。有小朋友嘅，呀佢今年識屙屎啦呀佢今年打飛機呀，又有得講。我呢？冇乜好講喎

7. 後生，仲會有升班呀（唏果時升班轉同學好大件事，同心儀女同學編咗唔同班可能就咁GG，而家好似少子化就冇呢啲嘢），考試呀，入大學呀，出嚟做嘢呀，初夜呀（我就連初夜都寫過），轉工呀，結婚呀都可以寫

8. 但到我咁年紀，唔生仔，唔搞生意，就冇乜好寫。最多係紅事白事，托賴冇乜。

9. 咁所以，往往要寫嘅，都係去旅行（well），（被）轉工，睇咗幾多戲，食咗幾多粒星，去咗幾多次日本，咁上下。

10. 不過今年都係有啲唔同，去片。

被炒記2.0—生涯第二次

11. 就是咁。12月14日，我在台北14天隔離中。忽然有人通知我，我被炒了。唔止send個email嘅，有開埋Zoom，仲堅持想見我個樣。係想睇我咩反應？好彩我掉走咗啲自瀆完嘅紙巾（14天隔離有乜做？）。又，好似應該係Letter of Redundancy，但what can you expect？而咁並唔會令我翻生嘅。呀，我當然係去到29號佢地三催四請我先acknowledge 啦，what can you expect？而聽講，我係放緊年假的。

12. 往後我會再寫篇文講，但，唔少人都問三個問題，我呢度答埋先。第一，「點解？」。噢，我早已學會唔問呢樣嘢。重要嗎？當然另文可能都會講，但真係不重要，你畀人飛都唔使問「點解」的。第二，「等你放假唔在香港先炒？」。咁to be fair，你放假唔在香港唔係一個要等你返嚟先通知嘅理由，況且唔止我一個。第三，「咁你會唔會在台北長住？」。咪玩啦，就算我想（而我暫時唔會），都不能。我出糧出到3月，傳說中的3個月通知

13. 影響？當然是有的，冇咗個收入來源喎。朋友都紛紛鼓勵，「係佢地唔識貨」（我不反對），「以你才華實好易XXX」。幾乎搞到連我都信埋。但，朋友梗係講呢啲，唔通講「你條仆街多行不義必自斃抵你有今日，我睇你點供樓？」？「你條死肥西嚴重overpaid仲邊有競爭力？」。可能事實，但唔會有人講。

14. 現實啲睇，我搵返份人工爭唔遠嘅工，我唔覺得好難。問題係，除咗人工仲有其他嘢嘛。「要做到我仆街我又唔願」。所以係有點難。

15. 至於生計呢？你睇我Patreon成千人訂，咁你大約都知我一個月收幾多。咁，點講都係冇咗份工我會冇錢開飯供唔起樓甚至要去少次日本。頂多食米芝蓮冇咁爽，不如唔好食兩星食一星（但，兩星先性價比高！）

16. 不過話說回頭，冇咗份收入，影響都係十是釘嫂（最撚憎啲人美式口音講十是單嫂，例如我大老細）的。你試下叫你公司個CEO減一半人工丫。係呀，對佢生計完全冇影響，但都覺痛的。

17. 寫得太長，大約係咁，另外寫篇新文講。

Patreon讀者救我全家，好人一生平安

18. 舊年嘅回顧寫過，2019成就之一，係Facebook Page有點成績。今年呢？2020年頭講緊7000人。去到年尾差不多一個double，當然亦都帶到啲收入畀我

19. 但，同我開咗Patreon比，Facebook Page不值一提。

20. 如果唔係12月畀人炒咗，咁我諗全年我放最重要嘅，就係，8月開咗個Patreon．十分，十分，十分重要。因為，真係算非常，非常，非常成功。4個月我上咗近1000個讀者。固然係我有料到（唔通我覺得自己廢都好意思收錢？），但亦係大家有眼光，肯支持我。

21. 亦都有機會另文寫。但正係因為有咗Patreon，所以12月14日我台北知道被炒時，雖然係有啲意外（12月頭先同我講緊下年大計），但我亦只係「哦」咗一聲。甚至好快手咁同埃汾太，朋友，網友講。

22. 我再冇好似2014年咁憤恨（唏嗰時第一次嘛），亦冇擔心生計。唔係故意扮不在乎，而我真係不太care．「話唔care你仲寫篇文？」。你就搞錯咗了，主要係娛樂你地，同埋用嚟吸新讀者。我本人真係冇乜感覺，甚至唔覺得值得要寫多幾篇文。至少你見我而家都仲未寫，頭七過晒，七七都嚟緊。

23. 唔係有咗Patreon嘅收入，我點會咁老定？況且，除咗錢，亦係認同。你地真金白銀畀錢覺得值，就係最簡單嘅認同。唔想好似好自大，但，我呢度嘅收入，已經多過唔少人嘅正職。仲唔係代表你地十分認同？肯定唔係阿豬阿狗都可以有咁成績

24. 我真係覺得開心之至，甚至幻想，原來我嗰種midnight in Paris嘅想像（睇得耐嘅讀者應該知道我幾鍾意歐洲），已經成真。就係以前啲畫家作曲家咁，靠啲貴族養，專心做創作。不過而家科技先進，你地變咗貴族。喂，幾咁寫意

25. 我甚至諗，我可以日本住兩個月，韓國住兩個月，台北住兩個月。周圍去。試問有乜工作可以咁？至少以我嘅能力，冇。美中不足係因為疫情冇得周圍去。

26. 所以，多謝大家。你仲未加入嘅，好快啲了。

台證消—本人已拎台灣居留證，一切都係為了這一天

27. 第三件大事，當然係拎咗台灣居留證，都係12月發生。亦係我年尾去台灣嘅purpose，舊年回顧都講過。2019年尾拎咗個副本，今次去換個正本，就係上面呢張卡。原本想復活節去換，但當時已爆疫情。延期一次，去到年尾，疫情依然。再唔搞？又要再搞良民證，又要做多次體檢抽多次血。咁反正剩埋好多年假，所以即使隔離14日都照去。中途仲畀人炒埋就估唔到。

28. 又係FAQ：咁我變咗台灣人未？請define 台灣人。但如果你講中華民國公民，我唔係。我冇護照，冇得投票，唔係公民。我拎嘅只係居留證，正如綠卡都唔同美國公民。但我可以在台灣工作（雖然我唔會）唔使額外申請，同埋入境唔使再拎台證。大約係咁。

29. 幾時過台灣？另文再講吧。但唔會係短期內。兩三年，應該唔會。但十年八年後？應該幾大機會。

投資 —股票總值升咗100%

30. 今年嘅投資，我覺得係不錯嘅。具體？我都唔係好知實數。知都唔同你講。一係啲友又話你炫富晒命（但我可以有幾錢？唔通有幾億港紙？定窮到得幾皮嘢？），一係又話你嘩咁撚少錢都拎出嚟講，冇意思。

31. 但我發現，真係好少人嘅個人回顧，會寫呢樣嘢，令我大感不解。而呢個同我做唔做金融係冇關的，我估即使我2021全年失業或唔係做返金融，我個回顧都仲會寫呢樣嘢，

32. 你話港豬又好，小乘佛教又好，顧掂自己先又好乜都好。但真的，冇人畀你自己更愛你，而做大事都係銀紙，銀紙，同埋銀紙。蔡英文政府批個居留證畀我，係因為我投資咗600萬台幣，唔係認同我有任何才華。講真，你嘅個人投資，點會唔重要過咩疫情重創經濟之類？

33. 言歸正傳，今年我嘅股票倉位總值，由低位（當然係3月），係反彈超過100%嘅。如果用年頭同年尾比，都差不多有100%。嘩。

34. 但唏，唔好興奮住。首先，唔代表我啲股票回報係100%．你心諗我買乜？我推嘅股票，Patreon讀者大約都知係邊啲，個別可能低位真係有一個開，但夾埋晒照計唔會。事實我亦只係追求同大市差不多同步，已經好夠。咁即係，我係有新錢放入去嘅。「包括大家Patreon嘅錢」「仲有啲人交年費」「其實Patreon嘅錢夠我買層新界樓首期」

35. 另外，股票倉位升100%，唔代表我副身家升咗100%（當然由3000蚊變6000蚊都係100%）。有其他嘢嘛。「喂你又話叫人stay fully invested？」。係喎，但，「咁我仲有層樓嘛」。冇正式計，但照計全年應該變動不大，可能估值微跌添，但我又還咗12個月錢，拉勻個net value（賣出去減返爭銀行嘅錢），應冇乜點變，都係200萬多啲。冇乜秘密丫，唔少人都知我住邊，一個單位幾錢好易知，咁我上年亦寫過爭銀行唔夠200萬。一計就計到。呢部份，當然原地踏步

36. 仲有，本人搞投資移民台灣，咁600萬台幣搞咗間公司嘛。咁撇除啲各種租金呀，入貨呀，水電呀，出糧呀，董事人工（即係埃汾太當年嘅生活費）之類，都仲有約100萬港紙剩。嗰度又係冇郁過。「點解唔買台股？」。有諗過架，但雞同蛋問題，我都唔係公民，又冇地址，難啲開戶。

37. 「咁現金呢？」。冇喎，除咗以上講嘅台幣外，我冇現金的。真係幾皮嘢都冇架。抽iBond都問朋友借錢，服未？

38. 2020對投資嚟講係極特別嘅一年，甚至特別過2008/9。會再寫文講

剛剛下集都出埋，呢度（https://bityl.co/52OG）

你仲未訂Patreon嘅，即刻去吧，月頭訂抵呀。（https://bityl.co/4Y0h）

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
Ivan Patreon，港美市場評點，專題號外，每日一圖，好文推介。每星期6篇，月費100蚊唔使，4個月已900人訂！（https://bityl.co/4Y0h）