6.3.2017 @ on.cc
挑戰勁辣麵 宋熙年陳智燊食到嗌晒救命
杯麵相信對大家嚟講都係居家必備嘅食物，每個人心目中都有自己喜歡嘅味道，有啲人就鍾意食原味、有啲鍾意食辣、有啲就鍾意古靈精怪嘅味道，總之就各有喜好啦！今次圈中嘅模範夫婦宋熙年（Sarah）同陳智燊（Jason）就同大家分享挑戰食辣麵，而少爺占就喺佢嘅電台節目聯同唐劍康（Donald）、杜如科（4Lum）、豪子為大家分享試食抹茶杯麵，網友都留言話兩段片都必睇呀！
辣到頭痕
Sarah同Jason不時都會拍片同網友分享佢哋嘅生活趣事，仲吸引好多網友爆like，點解佢哋咁受歡迎？咪因為佢哋嘅片夠晒貼地囉！今次佢哋仲拍片挑戰食辣麵，就試咗四款唔同款嘅辣麵。第一款就係「叻沙」，食辣嘢梗係要有嘢飲啦，Jason就真係對老婆好好，畀咗包好細嘅維他奶Sarah，但係自己就飲可樂，真係好搞笑，網友就話Jason好貼心，知道可樂會肥，所以就犧牲自己飲喇。而呢一款辣麵，似乎對佢哋嚟講都係小兒科，都食得好輕鬆，不過Jason食食吓就爆咗句食到個頭都痕仲戴埋頭箍，令到網友都大讚佢個look好正。
之後佢哋仲挑戰印尼辣麵同韓式辣杯麵，雖然有啲網友都話其實都幾辣，一定要飲嘢，但係Sarah佢哋仍然食得好輕鬆，真係難唔到佢哋。難怪唔少網友麵都讚佢哋好厲害，不過有啲就好搞笑留言問Sarah佢哋究竟一日食咗幾多個麵，好似食咗一年嘅份量。
終極挑戰
最後佢哋仲終極挑戰韓式最辣嘅麵，Sarah佢哋食咗一啖已經要不停飲嘢，又飲可樂，又飲水，佢哋食嘅時候，仲高呼超級辣，兩個食到面都好紅晒，又出晒汗咁，不知幾辛苦，真係隔住個mon都感受到有幾辣呀！所以網友紛紛留言叫佢哋挑戰還挑戰，唔好咁博，一陣食壞咗個胃仲衰，亦都好欣賞佢哋咁用心拍片。
