我有一個親生細佬，但我係好多人嘅哥哥。佢哋成日話我有一種做哥哥嘅氣場，其實我由細到大都好想有個姐姐。可能我係獅子座，人愈大就愈想保護我愛錫嘅人，慢慢就有好多好朋友開始成為伙伴、親人。
今年嘅生日我好開心，雖然我冇乜笑，但我真係好開心。快樂對我嚟講好重要，曾經嘅躁鬱症令我差少少就放棄音樂同生命，慢慢我開始唔想再追求物質，但求過得問心無愧，你對我好，我一百倍奉還，你對我唔好，冇所謂啦，you ain’t gonna hurt me，但如果你蝦我家人，I will fxxk you up！我係一個好麻煩嘅人，真心，我自己知道我有好多不足，但我好幸福，因為身邊都不乏天使。
其實8月13日一朝早，我收到一個好壞嘅消息，但因為我知道好多朋友已經為我準備咗生日想我開心，我唔想令大家掃興。我嘅師傅，首位華人世界聖誕老人冠軍、香港首席布偶師、香港魔術家協會創會會員——陳漢強先生响夢中離開咗我哋。佢係我唯一會叫「師傅」嘅人，响我同Newaystar解約過冷河期間，我受Harry哥哥邀請開始咗3年做兒童舞台劇嘅幕後工作人員，認識咗佢背後嘅道具師，就係佢呢位34年嘅好拍檔好朋友強哥哥。佢比我更大細路，比我更鍾意火影忍者，比我更工作狂，比我更願意當別人背後嘅神人，更加冇必要講，上至魔術機關、下至布偶雜耍，無一不精通。佢同我一樣，所有嘢都係自學，點解乜都識？因為窮。
萬寧貓、DaDaDeDe、福娃、爽貓貓、芝麻、𠲖哦⋯⋯無數個廣告、活動吉祥物，跨越35年嘅所有教育電視、兒童節目，你一定有見過佢嘅作品，但未必知道其實係出自同一對手，大布偶入面係同一個人。
師母話走得好安詳，一啲痛苦都冇，只係瞓一覺就冇再起身。雖然仍然年輕力壯，雖然我仲有好多嘢未學，但我會永遠記住同活出師傅對世界嘅愛。師傅太叻，個天唔想佢受苦，又或者天堂太悶，好想快啲接走佢返去。我會練返晒你教我嘅魔術、雜耍、特效化妝，如果唔記得，下次見面你再教返我好唔好？
Rest In Power Chan Hon Keung
香港魔術 在 Hong Kong Magic School 香港魔術學院 的推薦與評價
香港魔術 學院HKMS現正收生 為你嘅小朋友提供網上Zoom魔術教學 【課程特色】⠀ 高質影片– 專業導師團隊製作– 多角度拍攝，清晰講解，選用Zoom 應用程式⠀ ... <看更多>