去尖沙咀食過江龍壽司店，呢間餐廳喺日本有幾十間分店，香港店都開左3年左右。唔想walk in 冇位/要等，於是提前一日打電話去訂位，聽電話係一位操「譚仔話」嘅女士，一邊同我講電話，一邊同其他同事講野，再一邊自己細細聲唔知講乜，講野語氣有啲躁底，幾經辛苦留左檯，收左線我同阿Kit講：「呢間餐廳啲服務你預左好大鑊，聽電話嗰位完全唔似係正常日本餐廳。」
食飯當日我準時到，人頭湧湧，行埋去登記，有兩個staff，一位就係躁底阿姐，另一位係小朋友。我講完資料，佢冇畀飛我，又冇同我講乜，我企喺度都唔知等乜。躁底阿姐真係好躁底，行出行入同自己同事講野都係大大聲。我等左15分鐘，見佢有walk in 埋黎問會畀張飛，轉頭叫檯有時會叫number，有時會叫乜先生乜小姐咁。以我理解，有number係walk in，叫姓嗰啲就係有訂位。咁我企左15分鐘，佢就係咁叫number，咁我訂位黎做乜？我知一向有餐廳係唔當訂位係訂左位，分開兩條隊嘅又有、撈埋一條隊嘅又有，但我冇expect呢個價位嘅日本餐廳都黎呢套。
咁我就問下個小朋友搞緊乜？其實點安排啦？小朋友講野1999我都唔知佢講乜！轉頭阿姐出左黎，小朋友同佢交代，阿姐突然用手指指住我，好大聲咁講：「你就係陳生丫嘛，你企喺度唔好走呀！」WTF，我真係忍唔住即刻爆佢！「你係做緊日本餐廳唔係茶餐廳！唔該注意下你嘅身體語言同態度！」好彩佢都仲識say sorry。
First impression跌到零分終於有位，店內格局普普通通。我叫左一個極上刺身盛合、鮪魚壽司盛、另外再單點叫左6件壽司。食物對得住價位，份量合理、食材新鮮、舊飯中上。落單、上菜、結賬幾位員工好有禮貌。呢餐盛惠$1540 。
————————————
うまい鮨勘Umai SushiKan
地址：尖沙咀廣東道3-27號海港城海運大廈地下OTG04號舖
