《 準到喊 》
李懂媽師承賴布衣，精通五行術數奇門遁甲、摸骨摸肉全相掌相、吃喝玩樂酒色財氣無所不曉，準確計算到梁振英冇句真、年三十晚冇月光、同埋利物浦主場輸畀榜尾史雲斯2比3……不過我唔係蘇民峰麥玲玲李丞責李居明，唔使靠呃神騙鬼搵食，所以一直保持低調。
尋晚夜觀星象，合腿一算，我已經知道下一任特首係邊個，不過，上帝不嬲唔鍾意人哋爆響口，所以天機不可洩漏，我只能隱晦咁同大家分析，今年呢四隻禽畜嘅運程。
2017 歲次丁酉，即係雞，全年都係雞。
1950 屬虎嘅人
所謂虎落平陽被犬欺，無論去到邊度，一遇到有屬狗嘅人同場，都註定成年冇運行。
今年尤其是要注意腸胃，唔可以食葡萄、 車厘子、藍莓呀咁，就算任達華肯免費送一盒畀你都唔好制。
正月千萬唔可以去求神拜佛，尤其是有麒麟出沒嘅地方。
建議立春嗰日，搵一條黑色喱士底褲，唔係著住，係笠住個頭捐入棺材瞓一晚，咁就會逢凶化凶、亦轉性。
1957 屬雞嘅人
唔使講都知犯太歲，太歲係邊個？
黎智英囉！
屬雞嘅人今年要注意口舌同埋腸胃，小心禍從口出，唔出聲冇人話你係啞嘅，更加要提防病從口入，千萬唔可以食薯片，食一片都肯肯定會即刻畀now電視台記者兜心口撞一鑊 。
家宅擺設方面，要响客廳擺一個蘋果，用大頭針拮住，上面叫饒宗頤老師寫四隻大字 ： 【余有神助】。
建議初二開年嗰日，著一套全黑色修女服裝，等埋發叔去車公廟轉風車，叫「上帝」同「車公」揸扒，即係解決咗「上車」問題，功德無量。
1946 屬狗嘅人
係人都知道狗係人類嘅朋友，但唔L係上帝嘅朋友，所以只可以做一隻忠心嘅狗公，看下門口，吠下呢個、吠下嗰個，陪吓主人跑。
不過呢隻狗仲識搞棟篤笑，淨係攞廁紙嚟抽水，都可以呃幾千個like。
建議年三十晚，搵條金色狗鏈綁住左腳，另一邊綁住黃夏蕙條右腳，一齊玩狗人五足，去黃大仙廟跑三個圈然後裝頭炷香，如果第日冇十九幾萬個like加全港A1頭條，李懂即刻宣布因家庭問題唔再講大話！
1951 屬兔嘅人
睇兔仔個樣，老老實實，人人都會覺得佢溫純可愛，除咗兔唇（ 不過唔使擔心，搵王菲嗰個「嫣然天使基金」可以幫到手），所以屬兔嘅人，基本上係唔打得，不過扮打得。
屬兔嘅人最忌濃密二撇雞，因為兔鬚同貓鬚一樣，都係感覺器官，要疏疏落落先至搵到食。
建議年初三赤口，講手唔講口，剃曬啲鬚著番套「踢死兔」，同隻雞大戰三百回合，到時睇下係雞飛狗走，定係雞犬升天。
講咗咁耐，咁到底特首係邊一個？
有智慧嘅人，先至可以頓悟，答案就係呢條題目：
「 雞兔同籠，有頭65個，腳196隻，不過公雞會縮起一隻腳，而公雞嘅數目比母雞多3倍。」
數目比較多嗰一隻，就係未來特首！
李懂媽
麥玲玲師承 在 麥玲玲做律師樓秘書幫客睇八字︳棄靚仔揀工程師老公︳被傳媒 ... 的推薦與評價
拍照時請 麥玲玲 扮cool不笑，她不肯：「我笑好睇啲。」一張圓碌碌的笑臉是她的招牌，找玄學師傅要人夾人緣，燦爛笑容令人有好感； 麥玲玲 也是一位客串 ... ... <看更多>