《關於粵語的謠言下篇》陳心遙
《信報》2018年5月16日《視線所及》專欄
同人解釋粵語點解要保留落嚟，唔一定要喺歷史度搵答案，更加唔好搵錯嘅答案。例如話唐詩宋詞係用粵語寫出嚟，呢個絕對係謬誤嚟，以前冇電子媒介、冇錄音機、中文又唔係拼音文字，發音已歷千變萬化，而且各地不一；好似《尋秦記》咁現代人穿越返去秦漢唐宋都唔可能溝通到㗎。粵語同埋好多南方嘅方言，其實係保留咗中古語音嘅特徵，例如入聲，加上字滙相通，只可以話用粵語誦讀一定比普通話有韻味，也合平仄格律。
另一個傳遍天下嘅謬誤係話：當年粵語係喺全國決定共同語嘅投票入面，以一票之差輸咗畀普通話，仲話呢票係廣東人孫中山投嘅㖭。事實係喺清末到民國初年，無論政府定知識分子，都覺到要成為現代世界嘅民族國家，一定要改革語言，其中一項就係統一全國發音。
其實清末已經制定法案以北京話做國語，到民國初年，教育總長蔡元培邀請曾留學歐洲嘅吳敬恆，召開「讀音統一會」，徵集咗全國各省熟悉字音嘅專家，一人一票，逐粒字投票，會議中有好多爭拗，最後一個月通過六千五百幾個字嘅標準音，史稱為「老國音」。個會入面廣東代表係少數，唔可能以粵語凌駕其他方言。
當時各方已有共識「以北京音為主，兼顧南北」。嗰陣仲保留住入聲。之後又有北京音同國音嘅爭議、同埋以「國音京調」為圭臬作改革，到咗二十年代正式宣布以北京讀音做全國標準發音，是為「新國音」；大抵同今日嘅普通話相同。由此可見，所謂廣東話差啲成為國語之說，純屬子虛烏有。網上仲有流傳中國其他方言差啲成為國語嘅版本，全部都係謠言；背後，可能代表有人喺普通話強勢嘅情況下，保留母語同埋自己文化嘅心情。
統一語音嘅運動，有中國嗰陣嘅現實需要，例如列強環伺，要盡快確立民族意志；人多地大、語音紛亂，亦有礙提升教育水平同科學進步等等，簡化字嘅改革亦係有同樣背景。當時大概冇人估到而家有咁多渠道可以瞬間將概念同思想傳遍千里，好多人都唔需要執筆寫字，教育水平提高，每個人都可以好好咁學習同運用兩種甚至更多嘅語言。
即使喺同一個國家，都可以容納唔同文化百花齊放；更何況語言嘅活力，本來就係植根於人嘅日常生活，而各地所謂「方言」，正係保存所有文化細節嘅載體嚟。愛我中華文明嘅朋友會知道：一棵只有主幹冇開枝散葉嘅大樹，難成巨蔭。
#關於粵語嘅謠言下篇 #關於粵語嘅謠言 #粵語 #廣東話 #母語 #我母語係廣東話 #信報 #陳心遙
