《巧生活 — 戒片片》
對上一次買片片係7月30，呢四包片用左2個幾月都未用晒，因為巧兒大個女，戒左日頭既片片喇！
#22m，開始同佢睇戒片書，比佢陪我去廁所，過程中講解每個步驟，讓佢慢慢熟悉去廁所呢件事，又同佢講佢大個女就會好似媽咪咁，係廁所去大小便。嘗試比佢著住片片坐廁所去小便，等佢慢慢知道要係特定空間大小便。
#23m，佢開始意識到，同埋識得表達到自己大小便中，日頭時間就嘗試比佢著 #戒片褲。戒片褲可以好似 #尿片 咁，吸到一次小便，又好似 #內褲 咁，會比佢覺得濕左唔舒服。佢當時都仍然係屙緊先識講，所以一日都要換好多條戒片褲。不過我每次都同佢講：「巧兒，你成功去到小便，好健康呀，褲仔濕左唔緊要，可以洗！」
#24m，佢開始可以早30秒左右表達小便需要，有時去唔切，都會濕左少少，有時成功係廁所去到，我就超級浮誇地表達欣賞，建立佢自信同成功感。大便佢就唔係好肯係廁所去，佢話好臭。
#25m，日間既小便都幾乎可以成功係廁所去，大便只係間中可以，我不斷同佢講，媽媽、爸爸去大便都會臭，但沖走左，就唔臭架喇！
#26m，係廁所大便既成功經驗越來越多。每次小便隔既時間越來越長，大約一個鐘至個半鐘去一次。夜晚、午睡時間、出街著片片，日間在家清醒時間著褲仔。開始鼓勵佢出街如果想去廁所都同媽咪講，我可以同佢一齊搵廁所。
#27m，N班開學，同老師溝通過後，決定比佢著褲仔返學。成功係街都識表達 #如廁需要，即使要花時間搵廁所同排隊，佢都能夠係去到廁格，除左褲仔先屙。
#27m24d，今日早上係屋企玩，中午去飲茶，下晝午睡，夜晚出街食飯，巧兒一條片都冇濕過，實在值得紀錄。
依家淨返夜晚既一塊片片，唔知幾時可以戒甩埋呢？期待期待！😊
💡其他好文回顧💡
《巧生活—戒奶咀》bit.ly/byebyedummy
《巧巧成長—教出充滿安全感的孩子》bit.ly/nurturesecurity
《巧巧成長—點解爸爸媽媽要返工》bit.ly/parentsgotowork
《巧巧成長—接納孩子的恐懼》bit.ly/allowsfears
《巧巧成長—Trouble 2 變Lovely 2》bit.ly/trouble2lovely2
————————————
👍🏻讚好Facebook專頁 湊「巧」有本育兒經－Danielle Mama 家庭教育、親子活動、有趣玩意、懷孕點滴
