《觀塘駿業街市的高手隱世西餐小店。百里香Thyme》
吃貨上一份工響觀塘返工嘅關係，需要響觀塘到處覓食。記得第一個星期返工，就比一位ABC同事帶咗我去食呢一間性價比非常之高嘅小店，被荼毒之後仲一食就食咗半年返唔到轉頭😂究竟呢間小店有啲乜嘢魔力呢？
呢間叫百里香嘅小店位於觀塘駿業街街市一樓，係街市內嘅環境就唔講得上叫好，鋪面細細大概放到十張枱，有時候爆場佢會響出邊放多一排枱。
不過佢嘅食物同埋價錢就絕對會令人覺得驚喜！佢最出名就係佢嘅皇牌燒雞套餐，$45有半邊燒雞配薯角和菜，連餐湯，餐包和餐飲，凍熱同價，都咪話唔抵。燒雞的size其實是比一般嘅春雞大啲，剛烤出來的時候熱辣辣雞皮又脆，撕開雞髀時仲會爆汁，肉質嫩滑仲相當之入味，佢仲附有燒汁俾你淋上去，但係我覺得佢本身已經夠晒味唔使點汁。我記得第一次食嘅時候真係俾佢驚艷到！點解可以咁抵食之餘仲要咁高水準，相信係出面西餐廳食至少都要$70-$80，估唔到響街市入面都可以食到好野！
其實佢每日共有八款餐任君選擇，價錢大概都係$45至到$55咁上下，同樣非常有質素！頭一至四款基本上係fix左的套餐，除左皇牌燒雞套餐外，仲有墨西哥芝士薄餅同埋我幾鍾意嘅德州煙燻BBQ豬絲漢堡😋
至於第五至到第八款套餐就係老闆每個星期精心設計嘅fusion新菜式，有唔同國家嘅菜式同配搭，個個星期都唔同，比一兩個例子就知佢勁，好似有法色焦糖洋蔥汁芝士焗雞扒配飯或意粉，美國雞胸車打芝士香蒜文厘汁牛油果醬三文治🥪泰國檸檬葉青檸汁醃澳洲有機豬扒蕃茄粒菠蘿莎莎陳年黑醋汁煙肉薯仔沙律，啲名聽落係咪好似好勁先！雖然有時候不知道什麼是什麼，只知好食😂但係老闆改名真係好犀利！😂可能呢個禮拜食完，有機會下個禮拜就會冇咗，如果食到好味有啱胃口嘅，嗰個星期真係要食多幾次。
對於我呢啲熟客仔來講，頭一至四款式頭其實再好食日日食兩個月已經開始厭😅，全靠第五至第八款我哋先至可以保持到個新鮮感繼續去幫襯咋😂食物嘅性價比高，加上服務周到！難怪我的同事由一開始就幫襯到而家，仲感染到身邊嘅同事們一齊光顧！真心正👍
打聽下原來老闆就係嗰個厨師，每一道餸都係出自老闆嘅精心設計同埋嘗試，真係睇得出係用心嘅傑作！加上我相信佢選擇響街市開舖係對自己嘅出品有信心，寧願將價錢放響用了在食材上面，而且用心製作，顧客是吃得出的，而且性價比咁高，難怪愈來愈紅。👍👍
我知佢最近在連登加持下，越來越多人知道呢間隠世小店，搞到佢日日都大排長龍，當然我哋啲VIP食識得打電話訂定位啦！呢啲良心小店真係要多多支持呀 ！😋我轉工嘅關係之後應該少咗好多機會再嚟食😭不過我都會好掛住呢度嘅美味㗎！
最後吃貨提提你：
1. 想食皇牌燒雞記得要預訂啊！否則就白走一敞
2. 每日12點半前離開或者兩點半後去食仲可以減$5，真係好抵呀！
3. 百里香唔開晚市同星期日㗎!
——————————————————
店名：百里香 (觀塘)
環境🏝：6/10
服務💁🏼♀️：8/10
價錢💰：8.5/10
食物質素🍝：9/10
整體🙆🏻♂️：8.4/10
地址:
觀塘駿業街67號熟食市場1樓44號舖
#百里香
#吃貨玩樂
bbq 觀 塘 街市 在 BBQ Grilled and BAKED - Facebook 的推薦與評價
Page · Restaurant · 觀塘駿業里6號富利工業大廈一樓C · +852 9131 9850 · Rating · 4.3 (8 Reviews) · See More About BBQ Grilled and BAKED · Pinned post. ... <看更多>