我與食人者不得不說的故事（下）
上集：http://bit.do/fmSWG
阿明舉起刀，嗰一刻，或者係生物嘅本能呼喚我，
總之我全身嘅細胞都吶喊緊：「我唔想死！」
我翻身跳落床，忍住暈眩嘅感覺，順手拎住一個花瓶，狠狠擲向阿明。
阿明慘叫一聲，我用盡吃奶嘅力氣向外跑，我聽到佢喺後面大叫：「喂！」
我無回頭、無停低，我已經寫咗遺書，遺書度仲寫埋自願俾阿明食，阿明咁想食人，佢點會放棄到手嘅食物？
我跑出門口，外面只有一部車、一條路。
我無車匙，沿住直路跑，揸車嘅阿明好容易就追到我。
所以我毫不猶豫咁跑入大路旁嘅山林，愈跑愈入，一直跑到完全見唔到間別墅，我先敢停低喘氣。
穿過呢個山林，應該就會遠離阿明嘅別墅。
但係，棵棵樹都好似一樣咁，我應該點行？
我昏頭轉向咁行，太陽落山，天氣愈嚟愈凍，我依然搵唔到出路。
唔通，我嘅結局唔係俾人食，而係喺山林中餓死？
我唔甘心！唯一一次為生存而奮鬥，居然就要死，我果然係一個Loser。
我又攰又餓又渴，終於支持唔住，暈咗。
到我醒番嗰陣，我見到阿明，頭上綁住繃帶嘅阿明。
我瞓喺別墅嘅床上，阿明嘆氣：「好彩我搵到你咋，唔係你真係餓死都似，你點解突然擲花樽、跑入山林？」
「我唔想死！」喺生死邊緣，我先發現，原來我對生存仲有渴望。
阿明嘆氣：「唉，我都估到啦。你抖吓啦，一陣我車番你去車站。」
「你畀我走？」我呆一呆。
阿明反問：「點解我唔畀你走？」
我口窒窒咁答：「因為我應承咗......要俾你食。」
阿明聳聳肩：「咁你依加唔肯嘛，唔通我夾硬殺咗你嚟食？」
「我以為你會。」我細細聲講。
阿明強調：「搞清楚喎，我只係飲食上有特殊嗜好，我又唔係殺人犯！」
我仲有幾分不安，但係，阿明真係送我去車站，無做任何傷害我嘅事，只係佢情緒有啲低落。
返到屋企後，我仍然好迷茫。
阿明到底係點樣嘅人？佢明明殺過人、食過人肉，但佢又堅信自己唔係殺人犯。
不過點都好，至少我搵到活下去嘅理由：我唔想死，就係咁簡單。
過咗一排，我睇到新聞，阿明食人嘅事被發現，當然被拘捕。
阿明被控謀殺，但佢唔認罪，佢認為自己有取得對方嘅同意，唔算謀殺。
我都出庭作證，我唔識法律，我亦唔知阿明應該點判，我只係將我嘅經歷講晒出嚟。
結果，阿明嘅謀殺罪成立，被判終身監禁。
據講，阿明喺監裡面變成咗素食者，好多人都覺得無可能。
因為大家都下意識將其他人簡化，壞人就會做晒所有壞事，一件好事都唔做。
事實上，人係好複雜，一個人心狠手辣咁殺人，但同時佢可以係一諾千金。
以一個標籤代替一個人，從來都係誤會嘅開始。
－完－
改編自真人真事，Armin Meiwes上網物色被吃的對象，有數人被綁起後反悔，Armin客氣地放走他們。
Armin找到了志願者，殺人前，兩人曾以電郵詳細地商討食人的方法。
結果Armin因謀殺被判終身監禁，在獄中變成素食者。
將專頁設定為「搶先看」/ "See first"，最新故仔馬上睇！
新書《寓言地府動物園》已經出版了，現正發售中，
詳情可點擊這裡：http://bit.do/e37JG
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #我與食人者不得不說的故事
armin meiwes 在 Hi, I'm Armin Meiwes, and Cannibal Café was my idea - 相片 的推薦與評價
瀏覽Hi, I'm Armin Meiwes, and Cannibal Café was my idea 的相片、大頭貼照和相簿。 ... <看更多>