早排有間PR公司要搵copywriter，主要負責撰寫車同埋電子產品嘅新聞稿，人工由20k起錶，最盡可以叫到28k，雖然曾經做過記者，不過我熟嗰班人主要係做體育，港聞，同埋娛樂，而呢個job就係lifestyle為主，換言之我嘅network其實唔算match，盡人事叫班記者行家介紹，再出個job ad搵人啦！
及後有做記者嘅舊同事提醒我：「阿賢嗰陣咪做副刊嘅，試下搵佢囉！如果去到25k至28k，應該會考慮㗎！」
係喎，差啲唔記得，阿賢呢個人幾傳奇㗎，基本上每一版都做過，佢剛畢業嗰陣短暫做過港聞intern，我同佢共事嘅時間唔算長，事關有次奧運要全勤（成個體育組喺奧運期間冇得放假），因為太多即時新聞同埋加到十幾版，大單嘢例如香港運動員攞牌又要出多段稿擺去頭版，所以搵過阿賢客串幫手。
後來見佢做得幾好，體育版阿頭問過阿賢想唔想轉正，不過佢話興趣唔大，輾轉間又去咗另一份報紙做副刊，所以都係打去約佢傾傾先，順便聚下舊。
WhatsApp溝通咗幾句，原來當時大家都喺旺角，我去咗間影音器材公司買收音咪，因為辦公室日報嗰度想開Facebook live，而佢就住旺角，剛做完嘢喺度搵緊嘢食，既然咁近就約埋啦，佢send咗個msg嚟：「拉麵啱唔啱？」
我回佢：「冇問題啦，最緊要坐得舒服，傾到計。」
阿賢：「哦，咁得啦，旺角站B4出口，喺個商場落一層有個地方叫旺角煮場 Chefs' Society，嗰度有間味の時計台，我喺附近喇，你到咗入嚟搵我啦！」
去到終於見到佢喇，一如既往，又係full gear孭住部相機，仲有支Stabilizer（三軸穩定器），真係記者唔易做。
我：「今日拍咩？咁重裝備既？」
阿賢：「今日去咗拍滑翔降傘，要試玩，拎住部機拍個現場感，喂又幾過癮喎，你下次都可以試下。」
我：「副刊真係上天下海，以前我哋做記者主要文稿多，因為出去影嘢有攝記，而家做記者最好識剪片打字幕配音，玩下手仲要做埋街訪，budget少咗，負責嘅嘢反而多咗好多，千手觀音先搞得掂。」
阿賢：「係㗎，我嗰間好啲，有專人剪片，而家辛苦過以前好多啦。」
我：「咁有冇興趣見下頭先同你講嗰份copywriter？」
阿賢：「人工係正嘅，講真對我嚟講係吸引，工作時間亦比而家好，但問題係我對車同埋電子產品唔熟，不嬲冇研究開，你睇下我仲用緊iPhone7就知啦，我對食同玩嘅主題有興趣多啲，fashion都可以，如果我純粹為份糧轉工，怕會做唔長，一定悶死。」
說時遲那時快，我哋order嘅食物到咗，阿賢又職業病上身。
阿賢：「呢個特濃蝦湯拉麵，個蝦湯湯底係由日本直送到港，因為呢間味の時計台係北海道過嚟，啲湯好鮮甜同埋好濃；你呢個就係味噌牛油粟米拉麵，個味噌湯底帶有濃濃豆香，仲滲出蔬菜豬骨湯底嘅鮮甜層次；牛蒡粟米沙律高纖維又有營你都要試下，柚子梳打清新解渴啱唔啱？啱可以叫多杯；蕃茄果醋啫喱就近排好hit嘅，酸甜開胃，啱哂夏天食呀，遲啲嚟都會售罄，真係要試呀！」
我：「其實你有冇諗過做foodie？真心你開個page介紹嘢食應該得喎。」
阿賢：「有諗過呀，冇時間咋，所以你下次再有copywriter係負責寫飲飲食食呀，香港好去處呀，又或者潮牌fashion嗰啲可以搵我呀！」
啱嘅，每個人都有自己嘅興趣同埋專長，你要真心鍾意先可以樂在其中，好多人搵工純粹睇錢，身邊都有朋友係咁，結果唔鍾意就係唔鍾意，返工返到度日如年，捱兩三個月至半年又走，結果得不償失，仲會懷疑自己嘅能力，其實天生我才必有用，工作上覺得迷失，可能只係你未搵到屬於自己嘅舞台，所以大家都要加油，唔好放棄！
copywriter人工 在 辦公室日報- 早排有間PR公司要搵copywriter，主要負責撰寫 ... 的推薦與評價
早排有間PR公司要搵copywriter，主要負責撰寫車同埋電子產品嘅新聞稿，人工由20k起錶，最盡可以叫到28k，雖然曾經做過記者，不過我熟嗰班人主要係做體育，港聞， ... ... <看更多>