貝貝今星期考第4&第5間interview～仲爭3間就完成嗱！見今次考得相當之好，等我都做個小紀錄先，果然個衰女包真係會自己揀學校呀！
2間幼稚園都係一入去就見到sir滑梯！仲要係今日都開放俾小朋友玩架！！！所以貝貝一入門口就已經勁興奮，搶住想去玩，好彩今日無塞車，去兩間都早到咗少少，所以有時間俾佢玩一陣先去報到！玩到佢心情靚晒，又無賴死唔走，跟住就等interview啦！好幸運，今日兩間都可以兩位家長一齊入去面試～唔駛一個喺門口囉囉攣！
第1間（上午場）：
先入房玩玩具，明顯係等候區，無老師在旁mark分，都無人會問小朋友問題。跟住就轉房，去同老師單獨面試嗱～
一坐低，老師輕鬆形式問佢叫咩名，貝貝keep住笑但無答（我都好安慰，起碼佢有笑呀，上次係黑面）老師見佢無答就轉問邊個係媽咪？邊個係爸爸？貝貝快速指啱！老師讚佢兩句，見佢個心開始飄飄然😹
跟住老師就開始拎啲玩具俾佢玩，考咗幾多野！
1. 手抓版：呢個貝貝訓練有素，我對貝貝玩呢個超有信心，佢每次玩呢啲都超認真，同埋好有執著，每拎起一個圖案就自己講埋係咩黎（老師無問），例如講heart/花花/star，秒速完成✅全部一放就啱！講heart先好笑，貝突然間想指住我手腕紋身個心心😂但係我戴手錶遮住咗！老師r晒頭😹 之後老師指住circle問貝貝咩黎，好在貝貝咁啱識講（circle）問circle係咩顏色（無答），咁你鐘唔鐘意紅色呀？（鐘意）
2. 用夾仔夾起粒蛋糕仔，對應返個顏色放落唔同顏色嘅兜：老師本來想示範一次先俾貝貝夾，但未開始示範，貝貝已經勁興奮想搶住玩！玩到起晒身，唔肯坐低，其實本來佢無乜接觸過夾野，係最近返playgroup接觸完跟住學識咗，今次真係大派用場！望見老師都好滿意佢表現！貝貝係粒粒都思考過再放落去，又快又準～
3. 揭書：掂呀！係貝貝平時睇開果啲認知書！貝貝一揭已經開籠雀咁，一路揭一路講啲名，老師問嘅又識答，揭中一頁有鏡，又好搞笑咁自己照鏡，有個係浴缸，又話要沖白白，見到crocodile，仲興奮到即席演唱咗段歌！😹Row, row, row your boat，Gently down the stream，Merrily merrily, merrily, merrily ，Life is but a dream，因為呢首歌有一個版本係有crocodile🐊!
4. 跟住就俾多樣入窿窿嘅玩具俾貝貝玩，同時間老師就問家長問題，主要都係想問我地點解揀呢間學校～
跟住面試就結束嗱，唔知係咪因為朝早好醒神呢？我地都好滿意貝貝今次嘅表現！臨走仲好乖咁講晒byebye飛晒吻，仲自己拍好晒我地3張櫈先走～😹
第2間（下午場）：
又係玩具房先玩咗陣玩具，就入房Group in only ，大約有十個小朋友坐前面，家長坐後面
1. 唱歌跳舞做動作：貝貝唔識唱啲歌，但都有投入氣氛un下拍下手！動作都做咗少少，心情keep住好靚，成日都行出去想帶動氣氛咁～
2. 老師開始講關於公園嘅故事，跟住叫小朋友自己出去抽野，問佢咩黎，再貼返喺黑板相對應嘅位置，貝貝好快就想衝出去，但唔夠人快，一路都好心急想玩，最後佢抽中咗隻雀仔，佢好快就識答：bird bird，吱吱吱！好快又貼埋上黑板！跟住好開心返埋位！
3. 跟住老師想家長自己舉手講下點解想讀呢間學校，有咩期望，我即刻叫貝爸舉手🙋🏻♂️，老師都好似好滿意答案😸，仲話呢度好啱小朋友跑黎跑去，見到貝貝好投入主動，話係度返學會有好多野玩好多野學嘅地方～
4. 老師每人送一張貼紙，貝貝好似有講謝謝～
今次我畀貝貝表現90分🥰 ！可能因為今場再晏咗啲，貝貝瞓足晏覺之餘，又食飽咗，幼稚園個氛圍令佢好開心，又有好多戶外野玩，又有魚池同花園～
今日兩次表現都好醒神！希望有好消息啦，我對貝貝呢次都好有信心😊！亦都feel到佢好鐘意呢兩間學校，唔知黎緊仲有3間，佢又會咩表現呢？
1Y11M4D
——————————————
FB: 貝貝Alice-小寶貝夢遊日記
IG:bowl_lam
記得讚好我地 Page 之餘，仲要 Set 做搶先看呀～
#貝貝Alice #90後媽媽 #香港媽媽 #新手媽媽 #新手爸爸 #育兒日記 #育兒生活
