又放榜啦，一年十萬個中學生，得1.5萬個有資助學位，差唔多10個先有一個考到，咁另外9個點算呢？以下係一D我自己同身邊的例子：
1. 我。中學讀書唔差，但次次考公開試前的長假都係HEA玩，所以考唔到當年的大學。走左去讀副學士一年，爆GPA之後就考返學士學位，仲有獎學金。呢個故事話俾大家聽，第一次考唔到唔緊要，可能之後考得仲好呢。
2. 都係我。我就讀Finance既，但我一直做的工作：電子教學出版、網站編輯、社區管理、報紙編輯到現在教樂器，都係唔關finance事。呢個故事話俾大家聽，考唔到你想讀個科係唔緊要，最緊要係你鍾意做個樣野，就落力去做啦。
3. 我學生。佢考得唔好，是旦報左個營養學唔知asso定hd，但佢係一個大肥仔。我話：「無興趣不如算啦！」佢之後返左媽媽間公司做，仲話我知好有興趣維修結他。講緊係4年前，如果佢有心做，現在應該係一個唔錯的結他維修師。呢個故事話俾大家聽，趁後生，讀唔掂唔好夾硬來，興趣係最大動力。
4. 我同學。佢讀得好，考得好，入左好似中大定科大經濟，畢業入左間大銀行做，著西裝返中環。幾年後佢quit左，考紀律部隊，貪佢夠穩定，仲結婚生埋仔。呢個故事話俾大家聽，你讀咩同做咩，可以完全無關係，人生路有好多分歧。
5. 我舊同事。佢讀當時未正名的樹仁，再報理大讀language。一路打住牛工一路讀上去，現在phd啦。呢個故事話俾大家聽，你有心讀，無人阻到你。
由你放榜開始，就應該當自己係大人，認清楚個社會現實係點，你自己心裡諗法係點。
你有好多既想法同思考模式，都係多年來困係學校，被老師及同學影響而構成。係學校讀書，本身就係一個好唔自然的生活模式，完全同社會脫節。有層樓收租的人，係唔需要識sin cos tan的。
個現實係，一個社會唔需要咁多大學生，唔需要管理層仲多過執行人員。大把大學生出來都係十幾萬學債未還，仲要得個一萬幾千人工，又要俾家用又要生活，自己住仲要交租，想向上流仲要再進修。
做一個被社會需要的人，就會得到相對的回報。唔係考到一個咩層次的學位，就會得到一個咩層次的回報。
除非你係做專業人士，醫生、藥劑師、律師、建築師、測量師等等，唔考牌唔做得，否則唔好再講咩學位沙紙係社會的入場券啦。
社會唔需要入場券，社會需要會做好份內事的人。
