《當選了是他 我認輸 都不可怕 最怕其實被取消資格》
點解咁對啲 fresh grad 呢？
今年六月，勞福局局長張建宗喺立法會講及青年就業問題，指出今年經濟環境轉差，中小企對前景看淡，招聘意欲下降。政府會考慮開設非公務員合約職位，俾無工作經驗嘅畢業生投考，鼓勵非政府機構為畢業生提供短期工作機會。
梁天琦無得選，喂，政府出來解釋下點說服私營機構，聘用無工作經驗嘅畢業生？點鼓勵青年就業？梁天琦話佢俾人剝奪政治權利終身，無咗被選權利；我覺得佢係俾人剝奪「就業權力」終身，政府帶頭唔俾就業機會個後生仔，其他公司點睇？佢連份application form 都不獲接納。你選港男，交齊表格，唔夠靚仔最多落選，但TBB都唔會拒絕你交form啦，都有得首輪面試會見傳媒啦。連最唔公正，擺明有黑幕嘅TBB，門面工夫都做得無香港政府咁樣衰。
政府出來解釋下，點說服人相信更生人士會悔過？
梁天琦曾經up 過下港獨，之後佢又簽署聲明，又話擁護基本法，擁護一國兩制，選管會出來話，唔會信佢真心擁護，可能之後佢會再提港獨。政府而家唔俾人「改過自新」，咁拍啲宣傳片，叫人俾個機會「犯錯嘅人」改過，假架？
※※※
「政府俾個下馬威我哋，話俾大家知港獨係提都唔俾提」......但我覺得政府唔俾梁天琦入閘，取消佢資格其實好豬兜。梁天琦入閘，係有效分薄「反建制」參選人嘅票，新東原先有青年新政梁頌恆，有陳雲，俾梁天琦入閘，建制都有著數。out 咗佢，反而幫「反建制」集中票源。
梁天琦如果選到，經年累月，佢俾人唾棄嘅機會係偏高至甚高，你見所有「反建制」立法會議員係愈做得耐，支持度每況愈下，佢哋啲支持者都唔支持佢哋。你睇長毛，做得耐，激進都變溫和。佢選到，仲大機會愈來愈唔受歡迎。唔俾佢選，反而令全宇宙都支持佢。
梁天琦就算選到，佢都係立法會少數激進反對派，佢係以寡敵對眾個建制八婆。政府想玩梁天琦，日日派班建制八婆疲勞轟炸佢，好過out 咗佢啦。建制八婆連主席都頂唔住，做立法會議員根本係自己SM 自己，梁天琦咁都肯自告奮勇，毅力可嘉啦。點解咁睇少建制派議員嘅「教化作用」? 梁天琦有港獨思想，應該俾佢入立法會，俾建制個班八婆，葉劉，元秋，鼠王芬日日勞改咁重點教育佢，清除佢嘅「有毒思想」呀嘛。
※※※
今日有朋友同我講，佢話唔俾梁天琦參選，係分化香港人，搞到大家唔開心。
根據非常唔科學嘅觀察，全港民意應該係咁：
5%擺到明話俾人知佢親中，呢班人包括有錢人同痴痴地嘅人，梁天琦無得選，佢哋好happy；另外5% 拋個身出來，話支持香港民主發展，呢班人包括真心同假膠，梁天琦無得選，真心嘅好傷心，假膠嘅暗啞底偷笑；仲有90%人係對所有野都冇意見，或者佢有意見，但要佢出聲或行動，佢就有意見都變成無意見。
好似想香港死嘅人，比為香港感到傷心嘅人多。咁就真係「如今這算甚麼 我是否這麼討厭 只知道付出 以後都不知怎算」，so sad。
PS. 今年二月，我仲可以公開話投佢一票，而家投空氣.....
