【經濟通】比特幣周日曾大跌，市場太熱定係監管出手？
正所謂「生意淡薄，不如賭博」，香港人去馬交又要打疫苗又隔離咁，有幾個錢身痕要止癢點算好？近年來因為買賣比特幣方便咗，所以唔少人當佢係「另類賭場」，更有人按埋樓套現入場，咁誇？唔誇，不過本同日 (18日) 比特幣就高位跌一成三，究竟係市場太熱定係監管機構出手呢？賭仔們呢兩日應該嚇到無肉啦！
市場熱傳監管機構要出手，瑞信又有份？
根據Coindesk數據顯示，比特幣係18日由60990美元大跌一成三至53797美元。市場傳聞，美國財政部曾經指控多間金融機構，涉嫌利用加密貨幣進行洗黑錢活動，其中一間被指控嘅公司就係「世紀爆倉」中重挫嘅瑞信，如果係真的話就禍不單行啦！
不過，以上傳聞係未經證實，而美國財政目前拒絕評論，仲話不論件事有無開展調查，本身都唔會對「可能」進行調查嘅事件置評！其實近年來唔同國家都對數字貨幣密切關注，好似土耳其係上個禮拜就宣布，本月尾開始禁止使用數字貨幣用作支付用途，所以數字貨幣發展真係步步艱難。
Coinbase上市太興奮 炒完散水好正
另外一種講法，就係因為Coinbase上市前後消息日日出，成為比特幣破頂嘅「燃料」，好似加密貨幣投資銀行Galaxy Digital嘅創辦人Michael Novogratz係自己推特講：
「事後睇返，（下跌）確實係不可避免，因為市場對於Coinbase上市太過興奮，好似比特幣、XRP、狗幣基本上都會有爆嘅一日，所有跡象都顯示市場太過單一化；但隨住市場越多人進入，中期而言會開始變好。」
同時有人認為，數字貨幣暴跌可能係因為Coinbase上市後，管理層將所持股份係市場上出貨，所引起嘅連鎖反應。有資料顯示，Coinbase內部人士近期係市場合共出售1296.51萬股股份，涉及45億美元市值，其中公司CEO Brian Armstrong出售近75萬股，涉及金額2.91億美元。
央行副行長李波：正研究對比特幣監管規則
另一邊廂，博鳌亞洲論壇2021正舉行當中，央行副行長李波係會上表示，目前正研究緊對比特幣、穩定幣嘅監管規則，將來任何穩定幣希望成為一個得到廣泛使用支付工具，就必須要接受嚴格監管。佢又表示，數字人民幣目前未有具體時間表，未來中國會繼續做好試點工作，打造數字人民幣生態系統。
換個角度睇，如果內地肯出聲話規管比特幣的話，總好過完全封殺比特幣交易，唔知副行長呢番說話，對加密貨幣嚟講算唔算係好事呢？
#投資 #金融
