好耐冇 Update 過啦，因為呢個星期真係好忙！由星期三開始每一日一起身都最少收到超過 40 個 Email⋯⋯ 當中 100% 都係各大百貨公司、時裝店、電器家俱店等等講緊 Black Friday 、Black Week 貴公司將會有咩大減價優惠。咁我哋有咩好忙？梗係要忙住格吓價，睇下有咩抵買啦😆
瑞典呢個購物沙漠，沙漠之意唔單止種類款式少，而係兼夾貴。夠膽連瑞典本地出品牌子，喺外國甚至香港買都平過喺瑞典買幾成。所以，一年一度大減價一定係全民出動。睇平均每日 40 個 Email 呢個勢，Black Friday 開賣當日一定迫人過行年宵。果然，成個 Weekend 一街都係人，唔出去都唔知原來 Stockholm 住咗咁多人，平時佢哋到底匿埋曬去邊呢？
而瑞典有一傳統，由 11 月 24 日開始，即係 Black Friday 後一日，就可以開始為聖誕節做準備，例如佈置聖誕樹、點 Advent Candle、同埋重頭戲－Julbord。
Jul 係聖誕節嘅意思，而 Bord 就解枱，一齊即係聖誕枱。係唔係唔知到底即係做咩呢？其實 Julbord 係聖誕大餐，一大張枱放滿曬聖誕食物之意。唔少餐廳都會安排 Julbord ，大部分喺7月開始就接受預訂。除咗一家大細聚餐外，大部份公司都會為員工安排，即係類似我哋嘅 Annual Dinner／春茗。
Julbord 食物內容亦係十分傳統食物，除咗所有節慶固定登場不同口味嘅希靈魚，仲有聖誕特定嘅王子腸（Prinskorv）、仲有聖誕芥末( Jul Senap）配煙三文魚等等都係充滿瑞典特色嘅食物。而一啲質素較高嘅餐廳甚至會提供鹿肉、熊肉製成嘅肉丸同腸仔。
今日去開 IKEA，咁岩亦係 Julbord 開始第一日，場面非常墟堪！如果喺呢段時間嚟瑞典旅遊嘅你哋，一定要安排時間去食一餐 Julbord，體驗一下最地道嘅瑞典聖誕節。
