在茘枝角還押的義士袁智駒獄中點滴！
魚蛋革命案重審的第五被告志驅還柙中，以下是他和大家分享的近況。
————————————————
《監獄點滴》
有次去等探訪，見到個黑人同華人傾偈，開頭我睇書無為意，佢地傾左好耐我先知佢地一直講嘅唔係英文，而係廣東話，個黑人講得唔正講到似英文，而個華人聽到又用返唔正嘅廣東話同佢傾。好似有啲香港人同講國語嘅人會好自然將廣東話講到似國語。(自以為似)
我而家同啲「ON」(外籍人士)關係唔錯，有個ON成日同人傾心事，佢唔敢俾女友知佢係到。呢到有成日整蠱人嘅台灣仔，成日引人笑嘅黑人，仲有個鬼佬問我點睇香港社會，呢度啲ON最常用嘅打招呼句係「How are you?」，但呢度嘅標準答案唔係我以前小學教科書學嘅「I am fine, thank you」，而係「Good」、「Very nice」或者「古喔古打」(ON話意思係Good，好似學華人講「Good 啦」定「Good luck」)，啲ON夜晚仲會隔住牆同我講「Kui仔，I love you」，我會回佢「i love you too，巴打」。
仲有呢度啲人夜晚會「賽車」，鬥邊個架車大聲(其實係鬥邊個鼻鼾大啲)。不過其實佢地根本控制唔到，但都自稱係「法拉利」、「重機車」等等。好在我隔離無乜車聲，但半夜醒左發覺身邊訓左個麻甩佬都係唔慣，除左佔領成世人無試過咁。
試過有次係窗邊聽到其他地方有人唱《海闊天空》。我忍唔住跟佢唱左兩句，「從沒有放棄過心中的理想...」
前排電視新聞報導「黃背心」示威，有囚友同我講：「呢啲先係暴動嘛」，我俾唔到反應佢。
呢度某處寫左「到此一遊，從此別地」、但下面又有一句「到此N遊，重臨舊地」。我希望唔會再有人因為政治入黎，但更加唔想冇人再參與社運。
講完沉重野講返啲搞笑野。呢度有黑人好識搞笑，會用身體語言搞笑(似差利卓別靈咁)，不過我唔執輸，會學佢啲動作引返佢笑，佢真係笑左。仲有次電視播《安樂蝸》，有囚友話「歡迎黎到我嘅安樂蝸，荔枝角收押所」我真心笑左。我都試過用我可能會坐十碌黎講笑，笑到囚友們肚痛(詳細唔講，坐監現場先感受到)，雖然我地會苦中作樂，但唔可以將苦都當做樂，要臥薪嘗膽，奮發圖強！(忽然正能量)
PS 依家隻木顏色小學之後都無用過，係呢度再用返發覺有啲色唔錯，但質感麻麻地。
9/1/2019
—————————————
※在此謹代表驅聲明，驅目前並沒有接受任何組織援助。一切在囚支援工作和支出皆由親友負責。
※如果各位想寫信為驅驅打氣，請郵寄信件至「九龍中央郵政局郵政信箱70320號（PO Box 70320, Kowloon Central Post Office)」，我們會盡快轉送給驅。
p.s. 下次會開估點解駒咁多個名。
