【村上春樹文字有翻譯感？點解會咁？？？（咁你咪睇英譯本囉）】
#LostinTranslation
#村上春樹
#譯書
林少華同賴明珠筆下翻譯嘅村上春樹各有千秋，掀起愛書人之間嘅世界大戰。其實，爭咩丫super，不如兩邊都唔好睇囉，改行學日文睇原著啦！難啲？咁睇英文囉。
村上春樹嘅文字，其實本身就比唔少人戲稱為「翻譯體」：村上春樹嘅文字唔似日文，充滿翻譯感，究竟點解會咁？？？其實呢一點，同佢本人成長背景、閱讀興趣，以及最初入行時寫作手法有關。所以，有人話睇村上春樹一定睇英文，其實並非無道理架。
▍港口城市神戶長大嘅西化少年：Yung Murakami
講起神戶，大家除咗諗起神戶牛柳同Kobe Bryant之外，仲有咩呢？無錯，就係村上春樹啦。
村上春樹雖然係京都出世，但佢好細個已經搬咗去神戶（準確啲嚟講，係神戶近郊嘅蘆屋市），亦係神戶讀中學，所以，村上春樹成長時期基本上都係生活係神戶，嗰度對佢影響非常大。
咁神戶有咩特別呢？就係佢係日本一個好重要嘅港口城市。二戰結束之後，美軍仲駐守咗日本好耐，直到依家仲有唔少駐日美軍基地。村上成長嘅60年代神戶，就當然有大量駐日美軍啦。嗱，唔好以為軍人就唔睇書，佢地不知幾有文學修養。年輕時代嘅村上春樹可以係神戶嘅二手書店買到咁多英文書，都係因為駐日美軍都一樣咁鍾意睇書渣。
村上春樹三翻四次強調自己對日本文學無興趣，亦未曾比日本傳統文學感動過（當然真唔真，又值得研究，不過「村上春樹與日本傳統文學」又係另一篇文了，如果大家想睇可以留言講講），由細到大淨係鍾意睇歐美文學——特別係美國文學。總之，村上春樹嘅生活係比英美文學同音樂包圍嘅，潛移默化之下，佢對文學嘅睇法、思想，以及筆下文字，自然大受影響。
就連村上春樹本人嘅生活模式，亦都極為西化，佢鍾意食意粉、三文治、飲威士忌、蒲酒吧，呢d習慣都經常放入佢小說嘅角色入面，形成獨特嘅日系西化氛圍。日本有幾咁情迷西方——特別係美國文化，相信大家都相當清楚，村上春樹就非常象徵到戰後嬰兒潮成長嘅嗰一代日本青年（咁當然好多日本人嘅英文都無村上春樹咁好，村上春樹嘅英文甚至可能好過你同我添XD）。
▍寫作手法初探：先寫英文再翻譯做日文嘅《聽風的歌》
村上春樹文字嘅翻譯感，亦可以追溯到佢初初寫小說果陣，所用嘅「獨特寫作技巧」。
正因為村上春樹睇得好多英文書，佢自自然然諗野都會有種「英文嘅節奏」，正當佢29歲人第一次落筆打算寫《聽風的歌》果陣，就發現自己寫極都寫得唔順手。佢覺得自己比日文呢種語言困住，寫唔出自己獨有嘅氛圍——於是佢忽發奇想，決定試下用英文寫。
當然，就唔係成本《聽風的歌》都係咁寫成嘅。村上春樹先寫咗一段英文，再「翻譯」做日文（雖然話係翻譯，但又唔係逐字翻譯，比較似係睇住英文「重寫」）。慢慢，佢就發現自己掌握到自然、特殊嘅風格同寫法。之後嘅文字，就直接用翻日文寫，不過呢種日文已經充滿果種微妙嘅翻譯感。
村上春樹係《村上春樹雜文集》入面，都反問自己點解唔直接用英文嚟寫小說，跟住佢就坦承，只不過係因為技術上、能力上有問題，唔係咁簡單，所以先無咁樣做。取而代之嘅係，村上春樹一直都用自己方法將母語日文係腦入面轉換為外語，從而迴避自己意識中對日文嘅「日常性」。村上春樹仲提到，佢基本上唔會重睇自己寫嘅小說（日文版），但就會睇返自己小說嘅英譯本，因為可以從第三者嘅角度去享受自己嘅小說，所以佢非常感謝有人幫佢 #譯書。
▍村上春樹本人都係翻譯家
唔知大家知唔知，其實村上春樹本人都係一位翻譯家，產量仲要奇多，投身文學世界以來翻譯咗超過七十本作品，比自己寫嘅書多得多。
2017年佢仲就出咗一本書，叫《村上春樹翻譯（幾乎）全作品》（村上春樹翻訳(ほとんど)全仕事），講述佢咁多年嚟做過嘅翻譯工作。對村上春樹而言，寫作係工作，而翻譯則係一件類似興趣嘅事——大概就係「寫文寫到攰咪 #譯書 囉」。之所以揀翻譯作為興趣，係因為村上春樹相信可以從中攞到靈感，亦可以係其他作家身上學到好多野，從而幫助到寫作呢樣正職。正因為不斷反覆寫作／翻譯，村上嘅文字受到影響並帶有翻譯感都好合理。
對於翻譯，村上當然有好多睇法。佢提過，一本書理論上嚟講係唔會有正確嘅睇法，同樣道理，理論上都係唔可能有正確嘅翻譯。同一本書，可以有好多解讀方法，翻譯方法亦都有好多種，亦都需要按時代改變不斷更新。
翻譯無高低之分，只有喜好不同。村上春樹相信，好多文學作品都係無鑑賞期限嘅，但係無鑑賞期限嘅翻譯作品就並唔存在。所以佢自己都翻譯咗唔少前人曾經翻譯過嘅經典，例如費滋傑羅嘅《大亨小傳》同沙林傑嘅《麥田捕手》。
值得一提嘅係，係村上春樹翻譯費滋傑羅之前，日本係無乜人睇費滋傑羅嘅，不過因為村上春樹嘅名氣，先令日本人重新開始鍾意費滋傑羅——就正如賴明珠翻譯村上春樹之前，華文世界幾乎無人睇過村上春樹嘅書一樣。所以話，翻譯除咗講單純嘅技巧，有獨到眼光去選中值得翻譯嘅作品，其實都好難架。所以，無論你鍾意林少華多啲又好、寧願睇英譯本都好，賴明珠點都係功不可沒架。
唔好爭啦super唔睇中文睇英譯本傳送門：
https://www.bookdepository.com/search…
村上春樹英文官網，設計得幾靚，每本書嘅封面都好靚呢：
http://www.harukimurakami.com/library
============================
#村上春樹是怎樣煉成的
#1 【人生嘅荒謬就係你返緊一份錯嘅工而你樂在其中：讀卡夫卡《城堡》】：
https://www.facebook.com/ohreadly.hk/photos/fpp.823631624487252/833913313459083/?type=3&theater
#2【村上春樹：如果我們的語言是威士忌，咁就可以寫少啲字了】：
https://www.facebook.com/ohreadly.hk/photos/a.827045410812540.1073741828.823631624487252/836153699901711/?type=3&theater
#3《村上春樹の100曲》：
https://www.facebook.com/ohreadly.hk/photos/a.827045410812540.1073741828.823631624487252/838269839690097/?type=3&theater
============================
"Oh Readly?" - Flip a page everyday.
#一班鐘意睇書又想荼毒大家睇書嘅90後
#多多指教
============================
有文學野想分享？
歡迎各位Reader Inbox我地🐱
