⊙快將2歲4個月⊙
時間快過火箭，柯豬霎眼就快2歲4個月，再過一個多月就榮升家姐了。
今日下晝帶住柯豬去幼兒園交學費雜費通告。第一次以家長身份安排女兒讀書事兒，只是入門第一步已經要用2日去準備，day 1影證件相(要著靚啲頭髮都要整齊啲😂) ，揾家庭醫生寫健康紀錄卡，填寫表格簽通告寫cheque, 咁已經無左大半日。Day 2去拎相，再趁未落大雨拿拿聲衝去學校交文件。。。陀住8個月大嘅肚去攪啲咁嘅嘢都唔好話唔攰 = ='''
令人frustrating嘅一件小事係喺離開學校之時，柯豬脾氣發作，大吵大鬧唔肯離開，企喺梯級口歇斯底里咁喊。不足5分鐘內尖叫數次，連miss都走出黎門口睇下咩事(感謝miss幫手安慰，雖然佢都係繼續喊)。打攪到上緊小組班嘅老師&小朋友我覺得極唔好意思，但無耐我唔想夾硬捉佢走(一定會叫得更大聲，加埋要行兩層樓梯我驚有咩事一齊碌落去), 只好由得佢發洩直到佢好一點點就立即帶佢走 (嗰5分鐘長到好似成個鐘咁) 。
要制止一個歇斯底里地嚎啕大哭嘅小朋友真係好難，佢每一次尖叫都會觸動到阿媽條神經，令我有想用手摀住佢把口/一巴車埋去嘅衝動，但我都無做到(thank God~)。最近一個月，柯豬發脾氣時嘅反應愈來愈激動，輕則用口講：我唔要你/我唔想採你/我想打乜乜(人名/物件), 重則：用盡佢嘅音域尖叫大喊10-30分鐘，視乎佢有幾多能量。作為佢阿媽，見到佢咁樣都知佢有一半原因係因為疲倦而將脾氣推向極限，如果身處屋企，由得佢發洩到無力我都無所謂，如果喺公眾地方，影響到其他人就有啲不好意思。我成日都會喺柯豬發洩完畢後諗，如果下一次再遇類似情況，我應該點先可以處理得更好？好可惜到而家我都仲係未揾到一個better approach, other than "俾時間柯豬發洩完先安慰+講道理"。雖然知道其實仲可以用"分散注意力"嘅方法令小朋友快啲回復正常，但唔係下下都有適合嘅嘢咁啱喺嗰個時候發揮到作用。(好似頭先咁我用bubble gun吸引佢都改變唔到柯豬唔肯走嘅事實)
有時喺街上見到有啲小朋友發脾氣，個家長氹又好鬧又好，或者唔理佢由佢喊又好，有啲路人甲可能會覺得唔識教就唔好生啦咁，但其實喺事情背後可能個家長都努力應對緊，只是外人唔明白。好多時如果我帶住柯豬見到依啲情況，我會静静帶佢行開，因為我覺得唔好focus on個小朋友同家長身上已經係最大幫助，免得令對方壓力更大，有啲苦係做阿爸阿媽先明白。
#柯豬媽媽
#學習湊BB嘅柯豬
#養兒100長憂99
#toddler
#tantrum
