偉大的炸藥（下）
上集：https://bit.ly/3apqvr0
負責人好惋惜：「佢真係好偉大，如果無人捉住個炸彈，得三秒鐘，邊個都走唔甩。」
「唔可以有其他方法咩？點解一定要係佢？」我接受唔到呢個答案。
負責人答：「幾秒內真係諗唔到咁多。」
我忍唔住講：「你搞補習社啫，點會有人放炸彈？」
負責人支支吾吾，最後都講咗出嚟，原來佢以前係一個毒販，後來背叛大毒梟，轉做污點證人。
件事都過咗十年，佢就想做番啲嘢贖罪，開咗間義務補習社，幫貧困兒童補習。
佢估計，係大毒梟嘅心腹嚟報復。
我崩潰，我想打佢，但所有嘅憤怒都無濟於事。
後來，檢驗結果出咗，殘骸真係屬於阿偉。
放炸彈嘅人亦被逮捕，供出嚟嘅事，同負責人所講差唔多。
一時間，好多媒體都歌頌阿偉嘅偉大，但我唔想佢咁偉大，只係想佢好好活著。
阿偉死後，我好似變咗一個人咁。
我想報復，放炸彈嘅人已經被判終身監禁，但大毒梟過多幾年就會出獄，甚至我連補習社負責人都痛恨。
要報復，就要有更好嘅體能。
從前又懶又宅嘅我，開始日日鍛鍊，除咗鍛鍊之外，就係研究報復相關嘅資料。
我身上開始有肌肉，做運動係好事、係健康嘅，但唔知點解，屋企人叫我做少啲運動。
直到有一日，阿偉個妹約我出嚟。
佢同我講同一間大學，但我哋以前都唔太熟，阿偉有介紹過，就係無單獨見過面。
妹妹見到我，講嘅第一句說話係：「阿嫂，算啦。」
「你講咩？」我唔明白。
妹妹話：「阿哥過咗身啦，你好好生活，唔好折磨自己。」
「我有好好生活啊，呢排仲好努力做運動。」我勉強一笑，展示手臂嘅肌肉。
妹妹遞塊鏡畀我，我照一照，面上咩都無：「有咩問題？」
「我以前見過你，同邊個講嘢都笑瞇瞇。依加好似有一股......」
妹妹思索咗一陣：「狠勁。」
阿偉死咗無耐，我點笑得出？
見佢係阿偉個妹，我講出我嘅所有諗法，我連雞都無殺過，但我想殺人。
我唔知道應該點樣落手，但我願意付出一切。
點知妹妹唔支持我，反而問：「你覺得我阿哥，係咪真係一個咁偉大嘅人？」
「佢炸到屍骨無存，你覺得佢唔偉大？」我勃然大怒。
妹妹擺擺手：「我唔係咁嘅意思，喺我印象中，阿哥係善良，但未至於主動為大家犧牲生命咁偉大。」
我唔耐煩：「你想講咩啊？」
妹妹講：「我覺得，佢會掂個炸彈，係因為你喺度。」
我呆一呆，妹妹繼續講：「佢曾經同我講過，佢最鍾意見你笑，佢會好努力好努力，令你一直笑落去。」
「佢都有咁同我講過。」我聲音哽咽，當時只以為係一句普通嘅情話，無諗過會成真。
妹妹嘆氣：「阿哥努力咗，我希望佢嘅心願可以實現。」
我喃喃自語：「但我想幫佢報仇......」
「你想點，我都管唔著，我只係將呢件事講畀你知。」妹妹講完就走咗。
我仲應唔應該報仇？
世上有好多血海深仇，但有幾多仇，係死者真正想報；
又有幾多仇，係因為活著嘅人悲痛萬分，必須要搵一個目標嚟發洩？
－完－
我嘅職業係：網絡獵人：https://goo.gl/esVs2E
全家都想食我：http://bit.do/fedrQ
#短故 #短篇 #小說 #陳美濤 #廣東話 #粵語 #tomatochan #偉大的炸藥
唔好折磨自己 在 洪仲清臨床心理師- 想像帶給我們的折磨比現實還多「去想你 ... 的推薦與評價
關於自我肯定，就更是不容易了。雖然這是老調常談，可是我不知道各位朋友相不相信，有人的態度是：自己哪有什麼好肯定的？怎麼可以由自己肯定自己？當然要由他人來肯定才算 ... ... <看更多>