#鮨蕾 Sushi Tsubomi (銅鑼灣)
銅鑼灣登龍街2-22號V Point 22樓
-----
放左個悠長假期返黎 真係好唔想返工 對住公司部電腦成日 個人真係好sad 連我最愛嘅打食評都丟低左幾日 朋友仔見B仔假期後遺症咁嚴重 就帶B仔黎銅鑼灣靚靚高檔新商場V point食Omekase 希望可以用美食黎醫治好憂鬱嘅B仔
-
呢度一共有四款Omekase 其中一款係素食黎 第一次見Omekase有素食 雖然好特別 但係B仔最愛都係魚生🐟最後B仔同朋友仔都叫左最平嘅Omekase套餐-楓 （第一次黎 叫個最平嘅黎小試牛刀😄）
-
楓（$850)：成個set分別有前菜 刺身 燒物 壽司六貫 味噌湯同埋甜品
-
前菜：自家製蓮藕片 非常脆身 只用淡淡嘅鹽作調味 感覺健康 新鮮嘅水髮菜配撘左姜蓉同醋 食落酸酸地且好冰 水髮菜非常幼細 質感好得意 整體好似食緊冷面 栗子就經蜜糖水浸泡過 好清甜 仲有一粒自家醃製過嘅楊梅 酸甜多汁 好開胃😊
-
刺身：碟上有和風汁作裝飾 薄切嘅立魚透光度十足 魚肉白得黎帶淡紅色 肉質爽口 上面更撒上西柚皮碎 令整體甘甜中帶點清新 中拖羅上則放有北海道海膽 拖羅色澤鮮紅帶油光 無半點暗啞瘀紅色 雖然質素上乘但亦敵不過海膽嘅超級無敵鮮甜味 建議將拖羅同海膽分開食 以免拖羅味被掩蓋😆
-
燒物：是日燒物為鱈魚西京燒 鱈魚皮燒得極為香脆 唔係講笑 真係脆到好似薯片咁脆 鱈魚肉質嫩滑 而且Juicy得黎一D都唔油膩 食到B仔同朋友都連聲讚好🐟
-
6貫壽司：*石門魚 師傅話一年得好短時間當造 要喺佢當造季節先有得食 口感非常爽口 咬落回彈力強勁 加入青檸汁更顯鮮甜 *鱆紅魚腩 係夏季當造 油脂特別豐富 入口肥美 近乎即溶*伊佐木魚 壽司師傅為我哋選擇咗一樣係夏季非常當造嘅依左木魚 當季嘅伊佐木肉質豐盈肥美 鮮度拔群 用火槍輕輕燒過 帶有淡淡煙熏味 食落好幼滑*鰈魚邊 油脂味突出 食落其實好似左口魚裙邊 但脂味更出 記得要趁熱食 凍左會冇咁好食*熟成拖羅 喺呢度獨有嘅製法 由總廚自創 出面食唔到 拖羅以秘製醬油浸過 令筋位變軟 入口更幼滑 *北海道海膽壽司 海膽多到似山泥傾斜 每啖入口都極致creamy 鮮甜味滿瀉 😭食落有令人感動嘅感覺 可能係B仔暫時喺香港食過最好味嘅海膽
-
麵豉湯：麵豉味道調得恰到好處 唔會太淡太鹹 上枱時非常非常熱 好暖胃 將食完壽司之後嘅寒意一驅而散 飲完好舒服😊
-
夕張哈密瓜：以香甜多汁嘅當季夕張哈密瓜作爲結尾 整餐都非常完美🥰
-
♥︎Download 佢地個apps有95折
♥︎除左食物出色 服務態度亦極佳
♥︎上網做完research後發現原來呢度嘅總廚師承前日本首相橋本龍太郎之御廚松戶利雄🤓
-----
👶🏻B仔整體評價：9.3/10個👍🏻
（好耐冇俾過咁高分）
👶🏻B仔抵食程度：8.5/10個👍🏻
（以食物質素、份量、環境同服務黎講其實個人唔覺得貴）（海膽真係比得好大方）
👶🏻B仔環境評分：9/10個👍🏻
（乾淨、部份座位睇到海景）
👶🏻B仔味道評分：9.5/10個👍🏻
👶🏻B仔回頭機會：10/10個👍🏻
-----
#swallowhongkong
☺️快D跟住B仔一齊吞食香港啦！🤤
#swallowcwb
@ Sushi Tsubomi 鮨蕾
鮨蕾 在 酒諺和酒家- Sushi Tsubomi鮨蕾會在日本酒之日也是國慶的 ... 的推薦與評價
Sushi Tsubomi鮨蕾會在日本酒之日也是國慶的星期日( 1 Oct ) 有特別晩宴，Chef Michael特別創作10.1六道菜的清酒配對晚餐，精選5款清酒及迎新香檳，配以精緻新派美食。 ... <看更多>