《屍殺片場》影評（嚴重劇透）
「鏡頭以外精彩絕倫的一摔」
—
—
—
—
—
—
—
—
—
—
—
—
—
—
—
—
—
—
—
二十萬可以做到啲咩？可以買到幾塊階磚，可以買到架還可以嘅一手車，可以買到幾個名牌手袋，可以拍到一兩集《愛回家》。但日本仔用二十二萬港幣，就拍到一套可以衝擊世界嘅《屍殺片場》。
—
讚嘅說話唔講太多，已經吹到去又話咩百年一遇呀，一世後悔果啲老套嘢，呢套戲會係我今年睇過外語片嘅NUMBER 2，以極低嘅成本，交出好好嘅成績。
—
而更重要嘅係，作品能夠好有力咁向世界觀眾傳達嘅一個對全球電影市場一個極重要嘅訊息：一套戲抵唔抵睇，唔係睇套戲拍咗幾多錢，係咪Marvel，而係佢堅係好唔好睇。
—
《屍殺片場》嘅故事分成兩個部份，以最簡單嘅方式去講，第一部份就係就係一套半個鐘多少少嘅「喪屍電影」，電影係以「一鏡到底」嘅形式去拍，意思係HANDHELD鏡頭無NG拍出成套電影，放棄任何剪接。呢類拍攝手法需要台前幕後極多時間嘅準備，大家要好熟劇本同鏡位先知道要點走位，化妝、打燈一切點配合。
—
喺呢個一鏡過嘅故事入面，觀眾唔難發現有頗多不知所措同穿崩嘅位置，而《屍殺片場》嘅後半部份，就係向觀眾解構呢個一鏡到底拍攝嘅背後，到底發生咗咩事，同觀眾一齊以偽上帝實時嘅角度，道盡拍攝之苦。
—
而呢種苦，大多從導演呢位主角嘅視點出發，例如拉雜成軍嘅困難、要自己臨時做埋主角、器材嘅損壞、各種突發情況、演員嘅不受控制等等，準備幾周詳，臨場亦多爆肚，狂飛紙仔，疊羅漢，一幕又一幕電影人嘅辛酸。
—
鏡頭以外仲精彩過鏡頭以內，而成套電影最引起我注意嘅，係片尾一幕電影花絮：攝影師跟女主角跑入草叢，結果仆咗一次街，而呢一仆，就將成套電影昇華到去一個全新嘅層次。
—
《屍殺片場》入面，一共有三種「戲」，第一種「戲」係電影入面要拍電影嘅人物嘅製作成品；而第二種「戲」，就係用電影鏡頭去拍戲入面嘅人物係點樣拍佢哋喺戲入面套戲；而第三種「戲」，就係拍低《屍殺片場》電影嘅工作人員，點樣真實地去拍第一種「戲」。所以，第二種「戲」其實係虛構嘅，亦係劇本虛構出嚟嘅「戲中戲」，而第三種「戲」，就係根據第二種「戲」嘅劇本細節，去拍第一種「戲」。
—
第三種「戲」，係依附於第一種「戲」而生，因為第一係一鏡到底嘅成品，而第三就係拍低人拍成品嘅過程。從電影嘅邏輯去睇，第二種戲，亦即係戲入面「角色」拍攝戲中戲嘅辛酸，係一種預設嘅劇本。最大嘅提示見於喺第三種戲入面，攝影師有個鏡頭係故意將部攝錄機擺咗喺地上，而呼應番第二種戲入面，電影飾演攝影師嘅角色有腰傷企唔番起身。亦代表咗真實「一鏡到底」嘅拍攝，一早已經係喺諗好咗第二種「戲」嘅劇本之下而拍。
—
咁究竟係第一種「戲」拍先，定係第二種「戲」拍先？反正一切都在計算之內，本應無傷大雅，但喺第三種「戲」入面攝影師嘅果一仆，就比出咗一個驚人嘅答案。
—
喺真實拍攝「一鏡到底」嘅過程入面，攝影師真係差錯腳仆倒喺地，我哋可以喺第一種「戲」入面見到畫面嘅震盪，作為佐證。喺判斷呢一仆並唔係故意嘅前提之下（之前故意嘅都係扮仆），第二種「戲」就將呢一仆再次呈現喺觀眾眼前（肥妹攝影師視角），而呢一仆，係因為第三種「戲」嘅蝦碌而加上去嘅。
—
理論上，第三種「戲」為第二種「戲」服務，但因為第三種「戲」嘅突發情況，又影響到第二種「戲」嘅劇本，戲中戲中戲中戲，有邏輯影響，又互為影響，甚至不斷發酵出新嘅效果，電影唔係應該天生就有呢種活力咩？《屍殺片場》呢套戲，實在太太太太有趣。
—
咩都係錢，但創意同心思，係無價嘅。
—
屍殺片場One Cut Of The Dead
Movie Express電影速遞
handheld意思 在 而這種便攜式脈搏血氧儀非常易 - Facebook 的推薦與評價
#PulseOximeter #health #SpO2 #bpm #handheld #skincare #bloodoxygen #便攜式#指夾式# ... 是指心臟每分鐘跳動的次數，也就是在一定時間內，心臟跳動快慢的意思。 ... <看更多>